Central térmica das Pontes

Na Galipedia, a wikipedia en galego.

Central Térmica das Pontes

A Central Térmica das Pontes é unha central térmica de carbón situada no concello das Pontes de García Rodríguez (A Coruña), pertencente á empresa eléctrica ENDESA. Construíuse e púxose en funcionamento entre os anos 1972 e 1976. Consta de catro grupos de xeración de enerxía de 350 MW cada un, os cales se agruparon nun só grupo de 1400 MW entre os anos 1976 e 1979.

Orixinalmente deseñada para consumir exclusivamente o lignito local extraído da mina, a central foi adaptada entre os anos 1993 e 1996 para consumir unha mestura de lignito e carbón de importación en proporcións do 50%-50%.

O parque de carbóns da central ocupa unha superficie de 10 Ha, o equivalente a 12 campos de fútbol. A súa capacidade de almaceamento é de 250.000 toneladas.

A cheminea da central ten unha altura de 356 m, cun diámetro na base de 36 m e 18 m no pico, sendo unha infraestrutura única no mundo. Aparece no Libro Guinness dos Records como a cheminea de maior volume de todo o mundo.

A planta de tratamento de efluentes líquidos (Planta T.E.L.) depura a auga procedente da mina, da escombreira, da central e do parque de carbóns. A planta está deseñada para tratar caudais de auga que poden oscilar entre 0,45 e 30 m³/s.

Actualmente a central está sufrindo un proceso de adaptación a un ciclo combinado gas-carbón de 800 MW de potencia, debido ao fin da extracción do lignito na mina local e aos baixos beneficios do uso de carbón importado.