Oxyrhynchus
Na Galipedia, a wikipedia en galego.
Oxyrhynchus (grego: Οξύρρυγχος; "nariz agudo ou nariz afiado"; en antigo exipcio Pr-Medjed; en árabe dialectal do Exipto de hoxe el-Bahnasa) é un xacemento arqueolóxico en -Exipto, considerado como un dos máis importantes que se coñecen. Está situado a uns 160 km da capital exipcia, en sentido Sur-Suroeste. Durante o pasado século, a área arredor de Oxyrhynchus foi excavada de continuo, fornecendo unha enorme colección de textos en papiro datábeles nas épocas ptolemaica e Romana da historia de Exipto. Entre os textos descubertos en Oxyrhynchus figuran obras teatrais de Menandro e o Evanxello de Tomé, un importante e temperán documento gnóstico. As particulares condicións climáticas do lugar - clima seco e ventoso - favoreceron a conservación dos papiros durante séculos.
[editar] Os papiros de Oxyrhynchus
En 1896 dous filólogos novos da Oxford University, Bernard Grenfell e Arthur Hunt, iniciaron as excavacións na área da localidade, sacando a luz unha exorbitante cantidade de papiros.
A maior parte dos manuscritos son documentos públicos e privados, como códices, editos, rexistros, inventarios, actos de compraventa e cartas. Mais apareceron tamén papiros literarios. Entre as obras atopadas na zona son dignos de mención: poemas de Píndaro, poemas dde Safo e Alceo, fragmentos de dramas de Esquilo, Sófocles e Eurípide, e máis unha saliente porción das obras de Menandro. Atopáronse tamén os máis antigos e completos diagramas xeométricos da obra de Euclídes. Entre os papiros históricos unha ampla parte dos denominados Hellenica Oxyrhynchia, obra anónima relativa aos anos 396-395 a.C.. Tamén textos cristiáns, gregos e latinos, como fragmentos do Evanxello de Tomé, do Apocalipse de Baruch, do Evanxello dos Hebreos e máis unha obra de Santo Ireneo.
Os papiros recobrados consérvanse no British Museum. A publicación dos diversos papiros comezou en 1898 e continua na actualidade, téndose superado os sesenta volumes ata agora.
