FTP anonyme
De Wikipedia, le encyclopedia libere
FTP anonyme es le methodo le plus ancian e le plus commun de discargar files public via Internet. Le termino significa que on se connecte a un sito FTP (i.e. protocollo pro transferer files) con le nomine de usator "anonymous", le conto generic pro visitatores con privilegios limitate, normalmente de leger/discargar solmente.
Le majoritate del navigatores del web include un function automatic de FTP anonyme, discargante files cuje adresse URL comencia con "ftp://". Si le adresse puncta a un camisa in loco de un file, le navigator construe automaticamente un tabella de contento de illo. Isto rende possibile le interligamento transparente de FTP con le World Wide Web de maniera que on quasi non vide le differentia.
Le costume traditional es que on da con un connexion FTP anonyme su adresse de e-mail como contrasigno ficte, a fin que le administratores del sito pote contactar le usator in caso de problemas. Ma isto deveni de minus in minus commun con le commercialisation del internet, con le uso crescente de navigatores del web como clientes FTP que da solmente alcun codice generic, e con le crescimento del spam que rende gente suspiciose quanto al diffusion de lor adresses e-mail. Totevia, alcun pauc sitos FTP conservative bloca ancora hodie le connexiones de usatores que non da un adresse de e-mail con syntaxe valide como contrasigno.
