Unitates de base del SI

De Wikipedia, le encyclopedia libere

Le Systema International de Unitates (SI) defini septe unitates de base: unitates physical fundamental que ha definitiones operational.

Le altere unitates in le SI, derivate de iste unitates de base, es cognoscite como le unitates derivate.

Tabula de contento 1 Longitude 2 Massa 3 Tempore 4 Currente electric 5 Temperatura thermodynamic 6 Quantitate de materia 7 Intensitate luminose

[modificar] Longitude

Unitate: metro (symbolo: m)

Un metro es definite como le distantia que le lumine percurre in un vacuo in 1/299 792 458 de un secunda. Iste standard esseva adoptate in 1983, quando le velocitate de lumine in un vacuo esseva definite precisemente como 299 792 458 m/s.

[modificar] Massa

Unitate: kilogramma (kg)

Un kilogramma es definite como le massa del "prototypo international del kilogramma". Isto es un cylindro facite de un alligato de platino e iridium, manufacturate in le annos 1880, que es conservate al Bureau International de Pesos e Mesuras proxime a Paris. On se effortia verso le introduction de un definition basate super constantes fundamental o atomic.

[modificar] Tempore

Unitate: secunda (s)

Un secunda es le duration de 9 192 631 770 periodos del radiation correspondente al transition inter le duo nivellos hyperfin del stato fundamental de cesium 133. Iste definition esseva adoptate in 1967.

[modificar] Currente electric

Unitate: ampere (A)

Le ampere es le intensitate de un currente que, mantenite in duo conductores parallel e rectilinee de longitude infinite, de section circular negligibile, e placiate a un distantia de 1 metro le un del altere in un vacuo, producerea inter iste conductores un fortia equal a 2 × 10^-7 newton per metro de longitude.

[modificar] Temperatura thermodynamic

Unitate: kelvin (K)

Le kelvin es le fraction 1/273,16 del temperatura thermodynamic del puncto triple de aqua. Illo es nominate pro Lord Kelvin.

[modificar] Quantitate de materia

Unitate: mol (mol)

1. Le mol es le quantitate de materia de un systema contenente tante entitates elementari como il ha atomos in 0,012 kilogramma de carbon 12.
2. Quando le mol es usate, le entitates elementari debe esser specificate e pote esser atomos, moleculas, iones, electrones, altere particulas, o gruppos specificate de tal particulas.

[modificar] Intensitate luminose

Unitate: candela (cd)

Le candela es le intensitate luminose, in un direction date, de un fonte que emitte radiation monochromatic de un frequentia de 540 × 10¹² hertz e cuje intensitate energetic in ille direction es 1/683 watt per steradian.