Ido-konfero 2005
From Wikipedia
Ye 2005 la internaciona Ido-konfero eventis en Toulouse (Sud-Francia) inter la 23ma di septembro (arivo) e la 27ma di septembro. La kunveneyo esis che l' Aumônerie du lycée Pierre de Fermat en la centro di Toulouse, quan nia samideano Robert Pontnau aranjis por nia renkontro.
Indexo |
[redaktar] 23 di septembro
Dum venerdio, la 23 di septembro pos l' arivo di omna partoprenanti ye 20.00 kloko eventis inaugura vespero en la kunveneyo, ube omni prizentis su. La partoprenanti venis de Germania, Polonia, Nederlando e Francia.
La partoprenanti propozis kom temi diskutenda dum la laborkunsidi:
- adresaro di Idisti
- nova dicionarii
- retala Ido-forumi
- loko e dato dil Ido-konfero 2006
La maxim granda surprizo esis, ke yuna interesemo lojante en Toulouse asistis nia inaugura vespero.
[redaktar] 24 di septembro
Dum saturdio, la 24 di septembro, antedimeze eventis l' unesma laborkunsido. On diskutis koncerne duesma edituro di Ido-adresaro "Esez bonvenanta". Ca adresaro kontenas nomi ed adresi di Idisti, qui esas pronta gastigar altra samideani o helpar a li trovar hotelo edc. Esis propozata, ke aparesos advoko ad omna Idisti en nia Ido-revui e ye la reto donar lia adresi por nia adresaro. Adjuntesos anunc-formularo a nia adresaro a la chefa Ido-revuo "[[Progreso (revuo)[Progreso]]". Esis propozita publikigor la nomi dil gastiganti sen lia adresi che la ret-situo di ULI.
Pos l' unesma laborkunsido partoprenanti juis saporoza dejuno en Arabiana restorerio. Pose Robert Pontnau promenis kun altri tra la centro di Toulouse ed alonge la rivero Garonne. 17.00 - 18.30 kloko eventis la duesma laborkunsido che la kunveneyo. Ye 19.00 kloko kongresani travivis festo-dineo kun tipala saporoza sud-Franca repasti en la restorerio La Gaskono.
[redaktar] 25 di septembro
Ye 25 di septembro, sundio, dum la duesma laborkunsido en la kunveneyo on audis raporto da Eberhard Scholz pri l' aktivesi dil Ido-amiki Berlin. Nia samideano anke mencionis, ke nia samideani en Berlin diligente okupesas koncerne la enretigo e rinovigo dil existanta Germana Ido-dicionarii.
Laudesis anke la diligenta agado di Robert Carnaghan pri retala dicionarii en diversa lingui. Pos la laborkunsido konferani vizitis la famoza pulcomerkato, qua nur funcionas sundie. Pose on dejunis en la restorerio Flunch, ube on ipsa povas selektar multa modestprecala repasti. Dum la posdimezo kunvenanti partoprenis en guidita veturo kun turistala treneto tra l' urbo. Sequis la finala laborkunsido.
Konfero diskutis la propozo instalar nova Idala diskutoforumi che Google, pos ke Yahoogroups sen motivo nuligis un Idala forumo. Pro ke la majoritato dil partoprenanti ne pensas, ke existas urjanta neceseso havar plu multa retala diskutoforumi Idala kam existas, ca diskuto restis sen rezulto.
Samideano Schmidtchen ankore atencigis la konferani a l' Ido-konkurso aranjita dal Germana Ido-Societo depos plura yari sen regardebla rezulto e ke on devez motivizar Ido-interesemi partoprenar ofrante atraktiva premii.
Fine Eberhard Scholz propozis aranjar l' internaciona Ido-konfero 2006 dum la tempo inter la 25ma e 28ma di agosto 2006 en la Germaniana chefurbo Berlin. Kun ca propozo finis l' oficala parto dil Ido-renkontro 2005 en Toulouse. Pos komuna dineo en Turkiana restorerio nia samideano Robert Pontnau facis interesiva diskurso kun fotografuri pri lua recenta voyajo a Togo en Afrika.
[redaktar] 26 di septembro
Dum lundio, la 26 di septembro, la konferani aranjis totjorna komuna exkurso per automobili a la mez-epokala urbo Carcassonne. Pos retroveno ankorfoye manjesis en la restorerio Flunch' e pose adiis kun l' espero rirenkontrar okazione dil Ido-konfero dum 2006 en Berlin.
Dum mardio, la 27 di septembro, omna partoprenanti departis.
[redaktar] Danko
La partoprenanti di la konfero deziras kordialege dankar a nia samideano Robert Pontnau pro l' ecelanta aranjo dil kunveneyo e pro omna lua diligenta penadi ante e dum la konfero.
