Interretala pariado
From Wikipedia
Dum la lasta yari, nova ed profitoza merkato aparas ye la interreto. Ol esas la afero pri pariado, merkato qua nuntempe ja esas multaokazione plu profitoza kam la kustumala interretala komercado. Ma, quale bone pariar ye la interreto?
Indexo |
[redaktar] Interreto, altra sorto di komerco
Depos la popularigo dil interreto, multi esforcis por obtenar pekunio ye ica nova moyeno. Ma la simpla vendo di kustumala produkturi per interreto ne ofris la esperita ekonomiala rezulto. Multi kompanii ye la unesma yari dil 21ma yarcento faliis pro la skarsa nombro di vendi. Ica stando nomesis la krizo di la .com-kompanii, ed multi livis la interreto kom merkato.
Ma ne omni faliis. Pokope aparis profitoza merkati qui bone fitis ad la interreto. Nuntempe la merkato pri la interretala pornografio ganas milioni ed milioni de euri singlayare. Uli mem dicas ke la pornografio esas la ekonomiala motoro di la interreto. La anonima naturo di ica moyeno tre favoras la difuzo di ica merkato.
Altra bona interretala afero esas la aucionado. Kompanii quale e-Bay sucesis ed bone komprenis la maniero por ganar pekunio en la nova merkato. Ed la pariado esas un ek ita aferi qui tre bone fitas ad la ekonomiala sistemo di la interreto.
[redaktar] Pariado, anciena kustumo
La pariado sempre esis anciena homala kustumo, ed nuntempe ol esas tre difuzata en landi quale Anglia. La habitantaro di ica lando spensas averaje multega pekunio singlayare ad pariado. Ibe, esas posibla pariar preske ad irga afero: Sporto, politiko, edc. Tamen, esas landi qui ne havas tam profunda tradiciono kam Anglia, Germania od Austria, ed ibe, la pariado esas nelegalajo. Exemplo esas Hispania ed altra multa europana landi. Ma ibe, la pariado esas afero regulata da la guvernerio. La stato direktas la publika pariado ed koncesas specala licenco ad privata organizuri. Ma regulor tote la pariado en kompleta lando esas preske neposiblajo. Fakte, la stato ne persequas personi qui agas mikra parii. Nultempe ulu iros ad karcero pro agar sportala parieto kun amiki. Nur la polico persequas granda nelicencita parii qui movas grandega quanteso di pekunio, exemple ula privata poker-ludi en qui pariesas milioni di euri.
[redaktar] Quale pariar interretale ?
Ye la interreto nuntempe existas multa situi por pariar pri irga temo en irga lando. La chefa afero di ica ret-situi esas la sportala pariado. Kad vu pensas konocar la vinkanto di la teniso-ludo qua ludesos morge? Lore, vu povos pariar pekunio ad vua preferata tenisisto por ganar premio. Se vu divinas la vinkanto, vu multiplikos la pekunio segun la desfacileso dil pario. Exemplo di ret-situo por pariar interretale esas http://www.betandwin.com. Ol esas tre populara kompanio qua permisas pariar en irga europana lando. Olua chefa kontoro esas en Austria ed ja havas plu kam miliono di uzanti en Europa. La pagino havas parii pri sportala eventi ed mem propra kazino por pariar ad irga sorto di hazardala ludo.
Altra grandega loko por pariar interretale esas http://www.ladbrokes.com, kompanio qua apartenas ad la importanta angla “Hilton Group”. Ica kompanio anke permisas parii en irga europana lando ed la varietato di diferanta parii esas grandega: Futbolo, korbobalono, teniso, kuradi pri kavali, hundi, politikala aferi, televizionala programi, aktualeso.
La afero esas tre profitoza por la pario-kompanii ed pro ita motivo, dum la lasta yari naskis multa ret-situi: http://www.bet365.com, http://www.betfair.com, http://www.eurobet.com, http://www.unibet.com, ttp://www.pinnaclesports.com, edc. La kompleta listo esus grandega.
Anke, existas interesanta sorto di pario quan multi diletas: La “vivaca parii”. Ye ica sistemo, onu darfas pariar ad sportala ludi qui ja startis ma, ankore ne finis. Tale, esas posibla pariar ad la egaligo da la perdanta esquado ye futbolo od la plu ampla vinko da la favorata klubo.
[redaktar] Quale inkasar ed recevar la pekunio?
Generale, en ica sorto di aferi, inkasar pekunio esas tre simpla, ma recevar lu esas plu desfacila. Kande arivas la instanto por recevar la ganita pekunio kustumale esas videbla qua ret-situo pri pariado esas bona ed qua esas mala. Bona situo rapide sendos ad vu cheko od agos bankala transfero. La min bona situi tardigos la pago ed forsan kargos ad vu alta gelto pro obtenar vua ganita pekunio.
Nam ica sorto di pariado esas nelagala en multa landi, la chefa kontori di ica kompanii esos en landi quale Anglia ed Austria, ube la pariado esas legala. Pro ita motivo, kande vu recevos cheko kun la ganita pekunio, kustumale ol lojesos en banko qua apartenas ad ica landi. Kande vu intencos recevar la pekunio dil cheko en diferanta lando, la banko anke kargos a vu gelto pro la pago dil interlandala transfero, ed ica pago ulokazione povus esar kustoza. Do, ante recevar la pekunio, esas bona ideo lektar la pago-sistemi disponebla en la ret-situo, nam la maniero por pagar ed recevar pekunio anke definas bona parieyo.
La afero pri pariado esas tre difuzata nun ed mem existas interretala banki qua specale laboras kun ret-parieyi. http://www.neteller.com esas angla banko qua esas specale utila por agar plu chipa interretala transferi. Multi poker-luderi rekomendas uzar ol por sparar pekunio.
Laste, en multa landi existas senlegala stando pri la interretala parii. Per la interreto, reale la pario sempre facesas en lando ube la privata pariado esas legala, quale Anglia, ma la konekto povus iniciesar de lando ube la pariado esas regulata da la guvernerio, quale Hispania. Malgre ne esas specala lego pri ica sorto di parii en multa stati, la politiko pri lu esas permisar ol. Preske omni savas ke la afero ne esas legala, ma la guvernerii til nun ne serchas interretala parianti por denuncar li.
 |
Ica pagino uzas kontenajo de la revuo Adavane! numero 13, publikigita sub la Creative Commons Licence 2.0. |
