Norðurmýri

Úr Wikipediu, frjálsa alfræðiritinu

Norðurmýri er hverfi í Hlíðarhverfinu í Reykjavík sem markast af Snorrabraut í vestri, Miklubraut í suðri og Rauðarárstíg í austri. Norðurmörk hverfisins eru ýmist talin miðast við Njálsgötu, Grettisgötu eða Laugaveg. Það fer þannig eftir því hvernig hverfið er skilgreint hvort Austurbæjarbíó telst vera í Norðurmýri eða ekki. Hverfið dregur nafn sitt af mýrlendi sem var milli Skólavörðuholts og Rauðarárholts. Nyrsti hluti Norðurmýrarinnar, ofan Hverfisgötu og fram að sjó nefndist Elsumýri.

Samkvæmt fyrstu tillögum að bæjarskipulagi Reykjavíkur frá 1927 var gert ráð fyrir að járnbrautarstöð risi í Norðurmýri. Horfið var frá því ráði og á ofanverðum fjórða áratugnum hófst þar bygging íbúðahverfis.

[breyta] Götur

Götur hverfisins draga nöfn sín af persónum í Landnámu, Njálu og Laxdælu. Þær eru (í stafrófsröð): Auðarstræti, Bollagata, Flókagata, Guðrúnargata, Gunnarsbraut, Hrefnugata, Karlagata, Kjartansgata, Mánagata, Skarphéðinsgata, Skeggjagata og Vífilsgata auk hluta Njálsgötu og Grettisgötu sem telja má til Norðurmýrar.

[breyta] Byggð

Norðurmýrin er íbúðahverfi og flest húsin þar eru frá fjórða áratugnum. Flest húsin eru tveggja eða þriggja hæða steinuð fjölbýlishús með görðum. Við Rauðarárstíg og Njálsgötu er nánast samfelld tveggja hæða húsalengja. Hægt er að sjá greinileg merki um sig jarðvegsins sem stafar af þornun mýrarinnar á því hvernig garðar hafa sigið niður fyrir gangstéttar og garðveggi.

[breyta] Í bókmenntum og kvikmyndum

Í æskuminningabókinni Sól í Norðurmýri eftir Þórunni Valdimarsdóttur og Magnús Þór Jónsson (Megas) er lýst uppvexti ungs drengs í hverfinu.

Norðurmýrin er jafnframt sögusvið spennusögunnar Mýrin eftir Arnald Indriðason. Samnefnd kvikmynd Baltasars Kormáks frá 2006 sem gerð var eftir sögunni var tekin í hverfinu en áður höfðu mörg atriði í Bíódögum Friðriks Þórs Friðrikssonar verið tekin upp þar.