Eduardus Norden
E Vicipaedia
Eduardus Norden vel Septentrionalis vir doctus, philologus latinitatis peritissimus, qui anno 1868. a.d.X.Kal.Oct. in Frisia in oppido Emden natus anno 1941. a.d.III.Id.Iul. obiit Turici, parentibus Iudaeis ortus est, qui quidem more Germanorum vivere iam dudum assueverant. Pater eius Carolus Iosephus Norden medicus fuit. Septentrionalis duodeviginti annos natus ad fidem Christianam sectamque Lutheranam se convertit.
Qui cum litteris veteribus studeret, magistros optimos Hermannum Diels, Theodorum Mommsen, Eduardum Zeller, Hermannum Usener, Franciscum Bücheler audivit, a quo ultimo iuvenis anno 1891. ad dignitatem doctoralem promotus est. Anno post se habilitavit, ut primum in universitate Greifswaldiana, tum in universitate Viadrina in urbe Vratislavia, denique inde ab 1906. in universitate Berolinensi litteras Latinas profiteretur.
Cui cum anno 1935. a.d.XVI.Kal.Mart. a magistratibus Hitlerianis interdictum esset, ne Iudaeo sanguine ortus studiosos Germanicos doceret, anno 1939. cum uxore Turicum emigravit, quo loco mortuus est.
Libri eius, inter quos repperiuntur commentarius in librum sextum Aeneidis, liber de generibus solute scribendi antiquis, opera quaedam de cultu deorum Romanorum illustrissima, inter opera a viris vetustatis peritis conscripta auctoritatem maximam obtinent.
