Emile Metz
Vu Wikipedia, der fräier Enzyklopedie.
Den Emile Metz (* 23. Februar 1835 zu Eech, † den 13. Februar 1904 zu Dummeldeng) war den eelste Jong vum Norbert Metz.
Hien huet zu Paräis fir Ingenieur studéiert, an ass dono eng Zäit bei d'Bridder Waring schaffe gaangen, déi Eisebunnslinne gebaut hunn.
Eréischt dono ass en a sengem Papp säi Betrib, d'Société Metz & Cie schaffe gaangen. Op Virschlag vum Jean Meyer, dee Chef vum Laboratoire vun der Société Metz & Cie war, an deen doriwwer gelies hat, huet den Emile Metz säi Papp iwwerzeegt kritt, de Brevet fir den Thomas-Gilchrist-Procédé ze kafen, fir d'Minett ze ent-phosphoriséiern.
Den Emile Metz gouf Administrateur-délégué vun der Diddelenger Schmelz, der S.A. des Hauts Fournaux et Forges de Dudelange, déi 1881 opgeriicht gouf, fir ausschléisslech nom neie Procédé Stol ze produzéiern. 1885, nom Doud vu sengem Papp gouf den Emile Metz Comandité-gérant vun der Société Metz & Cie.
Den Emile Metz war och an der Politik aktiv: Tëscht 1874 an 1888 war hie Buergermeeschter vun der Gemeng Eech, an tëscht 1885 an 1899 war en Deputéierten an der Chamber.
1895, nom Doud vu sengem Koseng Edouard, gouf e President vun der Handelskammer.
Hien hat sech zu Beggen e Schlass baue gelooss, do, wou haut déi russesch Ambassade dran ass.
1904 ass den Emile Metz gestuerwen. Hie war bestuet mam Edmée Tesch, der Duechter vum Associé vu sengem Papp, dem Jean-Baptiste Victor Tesch-Nothomb. Seng Wittfra huet no sengem Doud eng Fondatioun an d'Liewe geruff, déi zu der Grënnung, 1913, vum Institut Emile Metz gefouert huet, dem heidege Lycée Technique Privé Emile Metz. Beim Institut Emile Metz gouf och e Grondstee gesat, fir him nach eng Kéier Merci ze soen.
