Fort de Tancremont

Vu Wikipedia, der fräier Enzyklopedie.

Vu an d'Entrée an op de Fort

Vu vum Fort de Tancremont op d'Nopeschdierfer

De Fort de Tancremont war de klengste Fort vum Festungsrank ëm Léck. D'Anlag huet d'Form vun engem onregelméissege Véiereck a läit op den zwou Gemenge Pepinster an Theux. Et ass eng vun véier neie Festungen, déi 1936 gebaut gi sinn. Zesumme mat 8 méi ale Festungen huet se zu der Position fortifiée de Liége (PFL1) gehéiert. D'Garnisoune vun deenen 12 Festunge waren een Deel vum Régiment des Forteresses.

De Fort huet sech am Zweete Weltkrich als dee leschten erginn, e puer Deeg nodeem d'belsch Arméi schonns kapituléiert hat. E läit op der Nationalstrooss N° 666 tëschent Tancremont a Pepinster a kann als Musée besicht ginn.

[Änneren] Geschicht vum Fort

De Fort gouf 1936 gebaut an den 8. August 1937 ageweit an huet eng Fläch vun 3.30 ha.

De 29. Mee 1940, 36 Stonnen no der Kapitulatioun vun de belschen Truppen huet dëse Fort sech erginn. Dat war keng sou einfach Decisioun fir de Kommandant vun der Festung, de Capitaine A. Devos, dee Batterie-Chef vum Fort war, well seng Verbindung zu den anere Festunge rondërem ofgeschnidde war, an hie keng Informatiounen iwwer d'Kapitulatioun hat. En huet awer, nodeems den däitschen Offizéier, de Generol-Léitnant Spang him säin Éirewuert als Offizéier ginn hat, datt de belsche Kinnek sengen Truppe gesot hätt opzehale mat kämpfen, sëch schliisslëch erginn.

[Änneren] Bewaffnung vum Fort

[Änneren] Waffe fir wäit ze schéissen

2 Kuppele mat 2 Kanounen vu 75 mm (Si konnte bis op 10.000 m schéissen)
- Dës véier Kanounen (FRC Modell 1934) waren an zwou versenkbare Kuppelen an de Gebaier B.II a B.IV agebaut. Si konnten an der Kuppel eran an eraus gezu ginn a ware vun der Fonderie Royale des Canons aus der Kanoun 75 mm Bofors vun 1934 weiderentwéckelt ginn, déi och den Artilleriesregiment vun de Chasseurs Ardennais equipéiert huet.

1 Mortiersblock mat 3 Mortieren vun 81 mm astellbar tëschent 300m an 3.600 m.
- Wëll d'Käschte fir Kuppelen ze bauen relativ héich ware gouf décidéiert, eng drëtt Kuppel duerch e Mortiersblock z'ersetzen, deen an der Mëtt vun der Festung sollt stoen. Dëst Gebai krut de Numm B.M. (bâtiment mortier). Déi dräi Mortierë waren an engem Wénkel vu 90° vunenee versat a stoungen an enger spezieller Kasemat déi sou gutt gebaut war, datt se all déi däitsch Bombardementer iwwerstanen huet. D'Mortierë selwër waren eng Entwecklung vun der franséischer Arméi aus dem Modell Stokes-Brand vu 1927/1937.

[Änneren] Waffe fir Noverteidegung

3 Schwéier Maschinnegewierer
4 Kanoune 47 mm géint Tanksen
- Dës Kanoune vum Typ FRC 47mm Modell 1936 stongen a sougenannte Kofferen. An de Kofferen C.II an C.IV stongen all kéiers eng, an am Koffer C.III zwou. Dës Kanoune ware geduecht fir d'Festung géint Tanksen ze verteidegen, wann déi sollte bis an d'Grief kommen.
26 Duebel Maschinnegewierer
7 Automatesch Gewierer
8 Flaken

[Änneren] D'Besatzung vum Fort am Mee 1940

15 Offizéier
54 Ënneroffizéier
500 Brigadieren an Zaldoten

Des Zuele si bis op e puer Ofweechungen no verschidden Auteuren genee . Bei den Offizéier kënnen et der och nëmme 14 gewiescht sinn, bei den Ënneroffizéier 59 a bei den Brigadieren an Zaldoten 449.

Dat hänkt ëmmer dervun of, ob den Auteur nëmmen d'Haaptfestung a Betruecht zitt oder déi baussenzech Positioune mat dra rechent.

[Änneren] Kuckt och um Festungsrank Léck

[Änneren] Déi al Festungen

- Fort de Pontisse
- Fort de Barchon
- Fort d'Evegnée
- Fort de Fléron
- Fort de Chaudfontaine
- Fort d'Embourg
- Fort de Boncelles
- Fort de Flémalle