Geschicht vum Film

Vu Wikipedia, der fräier Enzyklopedie.

[Änneren] Virgeschicht

De Mënsch huet nach ëmmer probéiert, bewegte Biller ze reproduzéieren. Esou kann een z.B. schonn an der Grotte vun Altamira d'Tentative feststellen, d'Bewegung vun den Déieren ze décomposéiren.

Et wor den Thomas Edison, dee sech zënter 1881 mat der Reproduktioun vun de bewegte Biller beschäftegt hat an deem et gelonge war, d'Biller mat sengem Kinétographe op eng Pellicule souple ze späicheren. 1889 huet hien de Kinétoscope erfond a brevetéiert. Heimadder konnt eng Persoun d'Bewegung vun de Biller op der Pellicule kucken, et konnt een se awer net projezéieren.

D'Joer 1895 ass d'Gebuertsjoer vum Kino, wéi d'Gebridder Auguste a Louis Lumière déi éischt Projektioune vun hire Filmer organiséiert hunn. Fir dem Edison seng Filmer ze projezéiren, hu si vun 1894 un deen éischte Projekter entwéckelt. Den 13. Februar 1895 konnte si hire Prototype, den Cinématographe brevetéieren. Déi éischt Kinoséance wor den 28. Dezember 1895 zu Paräis, wou Biller iwwer Familljen, Aarbecht an Aktualitéit gewise goufen.

[Änneren] Stommfilm

A Frankräich hunn éischt Produzenten, wéi de Charles Pathé an de Georges Méliès an déi nei Technik investéiert. De Méliès huet déi éischt Produktiounsfirma Star Film gegrënnt an 1886 deen éischte Studio zu Montreuil-sous-Bois opgemaach. Hien huet mat Tricke geschafft an esouguer schonns d'Biller manuell op der Filmsträif selwer coloréiert. Seng Filmer haten en enorme Succès a goufen an d'ganz Welt verkaf.

A ville Länner ewéi Portugal, England, Ungarn a Japan huet de Kino sech huerteg entwéckelt. De franséische Kino konnt sech weltwäit am beschte behaapten duerch den industriellen Asaz vum Charles Pathé an dem Léon Gaumont, deen 300 Filmer vun 1899 bis 1902 produzéiert huet. An Italien sinn "longs métrages" produzéiert ginn, déi 2000 bis 3000 m laang woren.

Ufanks koum de Kino an Amerika net richteg virun. Hei wor et den Edison, dee méi Wert op de Verkaf vu senge Patenter geluegt huet, wéi op d'Produktioun vun héichwäertege Filmer. Duerch d'Unioun vu Produzenten a Propriétaire vu Kinossäll konnt dem Edison seng Patentherrschaft gebrach ginn. Mat deene beschten Cinéasten an Acteuren aus Frankräich an Italien si gutt a laang Filmer produzéiert ginn. D'Gewënner vun dëser wirtschaftlescher Schluecht - Karl Laemmle, Adolf Zukor, Markus Loew, Samuel Goldwyn - wore bal all Propriétaire vu populäre Kinossäll, nickel odeons genannt, well hei Spectakele vun enger halwer Stonn fir 5 Cent opgefouert goufen.

A kuerzer Zäit hu si eng industriell Struktur a Kalifornien installéiert, déi konkurrenzlos um Weltmarché wor. De Sëtz wor zu Hollywood, engem Quartier vu Los Angeles. Déi éischt erfollegräich Hollywood-Période war duerch Nimm ewéi Charles Chaplin, Douglas Fairbanks, Mary Pickford, Rudolf Valentino a Ramon Novarro markéiert.

Déi europäesch Filmindustrie konnt deer mächteger Konkurrenz aus Amerika näischt entgéintsetzen. Am Éischte Weltkrich hunn déi amerikanesch Produktioune sech an allen alliéierte Länner duerchgesat. Nëmmen déi schwedesch an déi däitsch Produzenten hunn iwwerlieft. Si haten eng grouss Zäit nom Krich mat Leit ewéi de Victor Sjöström an de Maurice Stiller aus Schweden, Fritz Lang, Robert Wiene, Ernst Lubitsch, Friedrich Wilhelm Murnau, Carl Mayer, Georg Wilhelm Pabst a Lupu Pick aus Däitschland. Dës Periode goung zu Enn wéi Hollywood déi gréisste Perséinlechkeete mat fantastesche Kontrakter iwwer de Pull gelackelt huet.

An der Sowietunioun ass an dëser Zäit d'Entwécklung net stoebliwwen. Hei sinn duerch de Sergei Eisenstein, de Wsewolod Pudowkin an den Alexander Dowschenko vun 1925 bis 1928 monumental Wierker entstanen. Ee vun deene bekannteste Filmer wor Panzerkreuzer Potemkin (1925) vum Sergej Eisenstein. Déi sowietesch Filmer wore vun héijer Qualitéit an hunn haaptsächlesch déi intellektuel Milieuen ugesprach.

[Änneren] Tounfilm

1925 hunn d'Gebridder Warner sech d'Exclusivitéit fir d'Distributioun vum Vitaphone geséchert. Mat dësem System vun der Bell Telephone Company wor et méiglech, den Toun mat de Biller ze synchroniséiren. 1926 huet Warner Bros deen éischten, deelweis synchroniséierte Film (Don Juan) réaliséiert. Kuerz Zäit duerno ass mam Movietone eng besser Technique fir d'Synchronisatioun agefouert ginn.

Ufanks wore vill réputéiert Cinéaste génit déi nei Technique. Ënner hinnen den Charles Chaplin, deen iwwerzeegt wor, datt den Toun engem Film näicht brénge géif. Hie wor bis 1939 dëser Meenung. Wéi mer haut wëssen, huet de vertounte Film sech duerchgesat. Dialoguen an de Filmer hunn et erméiglecht, datt den Afloss vun Hollywood ofgeholl huet a vill national Filmindustrie sinn nees erwächt. Dat awer nëmme bis d'Sous-titres agefouert goufen.

An Däitschland huet de Kino eng nei Bléi erlieft, wéi vill ausgewandert Artisten erëm heem koumen. Aus dëser Zäit staamt de Film Der Blaue Engel (1930) vum Josef von Sternberg, wou d'Marlene Dietrich grouss eraus koum. Dës fruchtbar Période vum däitsche Kino huet bis 1933 gedauert.

A Frankräich woren et ënner aneren de Jean Renoir, de Jean Vigo an de René Clair déi de Kino bis ufanks dem Zweete Weltkrich geprägt hunn. Groussbritannien huet bekannte Perséinlechkeeten wéi Alfred Hitchcock, Anthony Asquith, Leslie Howard a Carol Reed eropbruecht. Déi éischt Festivaler sinn entstanen, wou déi verschidde Länner hir beschte Produktioune weise konnten.

An de Vereenegte Staten huet d'Kinosindustrie d'economesch Kris relativ gutt iwwerstan. D'Filmproduktioun gëtt vir d'éischt a streng Klassen agedeelt. Et ensti Genrë wéi de Western, de Kriminalfilm, de Krichsfilm, d'Musical, de komesche Film asw.. E puer Réalisateure (John Ford, Douglas Fairbanks, Howard Hawks, Frank Capra, Laurel an Hardy, Marx Brothers) konnten hir eege Personalitéit duerchsetzen. De Film Citizen Kane (1940) vum Orson Wells ass duerch technesch Innovatiounen ee Meilesteen an der Geschicht vum Kino.

Den amerikanesche Kino profitéiert vu vill expérimentéiert Acteuren a vun der beschter Technologie. Déi éischt Experimenter mam Faarffilm gi gemaach. Hollywood dominéiert mam Walt Disney am Beräich vum Dessin animé, eng Dominatioun déi och nach 30 Joer dono bestoe sollt.