Giustino (Händel)

Vu Wikipedia, der fräier Enzyklopedie.

Georg Friedrich Händel

Giustino oder Justin (HWV 37) ass eng Oper vum Georg Friedrich Händel an dräi Akten aus dem Joer 1737.

De Stoff fir den Operentext baséiert op enger Dichtung vum Niccolò Beregani. Dës erzielt fräi vun historesche Perséinlechkeete vum byzantinesche Räich, vum Keeser Anastasios I. a sengem Nofolger Justin I.. D'Beregani-Dichtung hat schonn e puermol als Virlag fir Opere gedingt: 1683 beim Giovanni Legrenzi, 1711 beim Tomaso Albinoni a 1724 beim Antonio Vivaldi. De Libretto dee vum Händel benotzt gouf, gouf vun engem onbekannten Dichter op Basis vun deem Text erstallt, deen de Pietro Pariati fir den Albinoni geschriwwen hat.

Giustino ass an engem aarbechtsräiche Joer entstanen. Den Händel huet de 14. August 1736 mat der Aarbecht ugefaangen, a wor den 3. September mam zweeten Akt fäerdeg. Bevir hien d'Oper fäerdegestallt huet, huet hie vu Mëtt September bis Mëtt Oktober d'komplett Musek fir Arminio geschriwwen. Eréischt duerno huet hien sech nees un den Giustino gemeet, an d'Wierk den 20. Oktober fäerdeggestallt. Mëtt Dezember huet en nach mat der Kompositioun vu Berenice ugefaangen.

D'Première huet de 16. Februar 1737 am Covent Garden Theatre stattfonnt.

[Änneren] Ëm wat et geet

[Änneren] Éischten Akt

Fortuna vum Albrecht Dürer

Nodeems den Anastasios vun der Ariadne zum Keeser gekréint gi war, gëtt hie vum Amanzio drop opmierksam gemaach, dass de Vitalian mat senger Arméi d'byzantinescht Räich a Gefor bréngt. De Polidartes bitt als Dréier vun Vitalian e Friddensschloss un, mee ënnert der Bedingung dass den Anastasios d'Ariadne goe léisst. Den Anastasios leent of.

An enger ländlecher Géigend pléit de Justin e Feld. Hien dreemt dervunner, als Krieger zu Ruhm ze kommen, mee gesäit awer säi Schicksal doranner, an der Landwirtschaft säi Liewen ze verbréngen. Do erschéngt him d'Fortuna a fuerdert hien op, an d'Schluecht ze zéien, an seng Hütt géint e Palais ze tauschen. Den éischte Schrëtt dozou gëtt dann och direkt ageleed: Beim Fortgoe gesäit hien d'Leocaste, déi vun engem Bir verfollegt gëtt, a bréngt dësen ëm. Als Merci hëllt si hie mat an de Palais.

An hirer Kummer fuerdert d'Ariadne den Amasios op, hir ze hëllefen a mat hirem Mann an de Krich ze zéien. Den Amansios iwwerleet iwwerdeems, wéi hien op den Troun kéint kommen.

Den Anastasios mecht de Justin zu sengem Ritter a befiehlt him, d'Ariadne ze befreien, déi bei engem Ugrëff an der Nuecht vun der Arméi vum Vitalian an d'Hänn vum Feind geroden ass. Beim Vitalian am Militärlager gëtt d'Ariadne him virgefouert. Hie freet si elo direkt, fir seng Fra ze ginn, mee si bleift dem Anastasios trei. Doropshin gëtt de Vitalian dem Polidartes den Uerder, si engem Béischt fir ze friessen ze ginn.

[Änneren] Zweeten Akt

Den Anastasios an de Justin strande mat hirem Schëff a ginn an eng Hütt u Land fir ze raschten. De Polidarted daucht op a léisst d'Ariadne un e Fiels ketten, wou si op d'Béischt waare soll. Wéi d'Béischt erauskënnt, gëtt et vum Justin ëmbruecht an et kënnt zu enger Wiedervereenegung tëscht der Ariadne an dem Anastasios.

Nees mecht d'Handlung e Sprong. De Justin huet an der Tëschenzäit de Vitalian geschloen, a féiert hien a Kette virun de Keeser. Den Anastasios seet him Merci a schéckt de Vitalian zu der Ariadne, déi hien an en Tuerm aspäere léisst.

[Änneren] Drëtten Akt

Tremississ vum Justin I.

De Vitalian gëtt vu senge Leit befreit a schwiert sech ze rächen. An der Tëschenzäit probéiert den Amansios beim Anastasios Mësstraue géigeniwwer dem Justin ze séien, deen elo als neie Rebell kéint d'Muecht u sech räissen.

D'Ariadne deelt dem Justin hir Bewonnerung fir säi Mutt mat, a schenkt im e Rimm voller Bijouxen, deen den Anastasios hir geschenkt hat. Den Amansios erzielt dem Keeser vum Geschenk an deit et als Zeeche fir eng Léift tëscht dem Justin an der Ariadne. Dorophinn entbrennt am Anastasios d'Mëssgonscht vis-à-vis vum Justin. Wéi den Justin zesumme mat der Ariadne an der Leocaste virun him erschéngt, léisst hien de Justin oofféieren.

D'Leocaste, déi den Amansios fir de Verräter hält, iwwerleet sech, wéi si de Justin rette kann, an deen si sech verléift huet. Den Amansios freet sech dass säi Plang gelongen ass.

Nodeems de Justin vun der Leocaste befreit ginn ass, irrt hien ëmhir. An enger Biergschlucht fënnt de Vitalian hien, wéi hie grad schléift. Wéi hien en ëmbrenge well, deet sech de Bierg op an d'Stëmm vum Vitalian dem Eelere verkënnegt him, dass de Justin säi Brudder ass. Déi zwee versöhne sech a beschléissen, de Verrod vum Amansios ze rächen.

An der Tëschenzäit huet den Amansios den Anastasios, d'Ariadne an d'Leocaste a Kette geluegt, a sech selwer zum Keeser gemaach. Elo kommen de Justin an de Vitalian a verdreiwen hien, an et kënnt zu enger grousser Versöhnungsfeier.