Jean-Louis Pons
Vu Wikipedia, der fräier Enzyklopedie.
De Jean-Louis Pons gebuer de 24. Dezember 1761 zu Peyre (Hautes-Alpes) a gestuerwen de 14. Oktober 1831 zu Florenz, war e franséischen Astronom.
Tëschent 1801 an 1827 huet de Pons 37 Koméiten entdeckt , an ass domat bis haut deen erfollegräichste Koméitenentdecker.
Dem Pons seng astronomesch Lafbunn huet 1789 am Alter vu 27 Joer ugefaangen. Hie war Hausmeeschter am Observatoire vu Marseille. Den Direkter vum Observatoire huet him niewebäi Lektiounen an der Astronomie ginn. Säin éischte Koméit huet de Pons am Juli 1801 entdeckt. Vun do u spezialiséiert hie sech, wéi seng Landsleit Charles Messier an Pierre Méchain, op d’Sich no Koméiten a fënnt der bis zu 10 an engem Joer (August 1826 bis August 1827).
De Pons benotzt spéider selwergebauten Teleskopen, iwwer déi allerdéngs nëmme wéineg bekannt ass. A sengen Opzeechnunge fanne sech Hiwäiser, datt säi „Grousse Sicher“ e Gesiichtsfeld vun 3° hat. Et handelt sech soumat offensichtlech ëm en Instrument mat grousser Ëffnung, relativ kuerzer Brennwäit a klénger Vergréisserung, dat och als „Koméitesicher“ bezeechent gëtt.
Opgrond vu sengem Erfolleg krut de Pons 1813 d’Plaz vun engem Assistent um Marseiller Observatoire. Am Joer 1818 huet hien de Lalande-Präis vun der Franséisesch Akademie vun de Wëssenschaften krut fir d’Entdeckung vun dräi Koméiten an engem Joer. 1819 huet hien eng Ernennung vum Maria Isabel vu Spuenien kritt. Hien ass Direkter vum neien Observatoire vu Marlia bei Lucca an der Toskana ginn. Säin Titel war „Hirer Majestéit hire kinneklechen Astronom, Direkter vun der astronomescher Sektioun vum Observatoire a Professer Emeritus vum kinnekleche Lycee“. De Pons huet onmëttelbar nodeems en zu Lucca ukomm war, e weidere Koméit entdeckt an den Observatoire huet enger glänzender Zukunft entgéint gesinn. D’Leeschtunge si bescheide bliwwen an no véier Joer gouf de Betrib vum Observatoire agestallt. De Pons hat zu Lucca siwe Koméiten entdeckt. Am Joer 1825 ernennt de Groussherzog Leopold II. hien zum Direkter vum Observatoire a Musée fir Physik a vun der Naturgeschicht zu Florenz. Bis zu sengem Doud entdeckt de Pons nach weider siwe Koméiten.
Obschonns de Pons véier periodesch Koméiten entdeckt huet, hunn nëmmen nach zwéi säin Numm, nämlech de 7P/Pons-Winnecke an den 12P/Pons-Brooks. De Koméit deen hien de 26. November 1818 entdeckt huet, gëtt haut als Encke bezeechent, benannt no dem Astronom Johann Franz Encke, deen d’Bunn vun dësem Koméit berechent hat, an deen eng bemierkenswäert kuerz Periodizitéit festgestallt hat. De "Pons-Coggia-Winnecke-Forbes" heescht haut 27P/Crommelin, nom Andrew Crommelin, deen dës Bunn berechent huet.
