Koargebed
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
'n Koargebed ies bie de katholieke 't gezamelik gebed of zank, oetgeveurd door geistelike, monnike, kannunike, broedersj, moniale, zuustersj, nonne of ander religieuze. In kloastersj ies 't 'n dageliks truukkièrende activiteit, die plaatsvingk op 't koar, veur in de kèrk. Dees ruumde ies dèks aafgesjlote door 'n koarhèk of doksaal. In kloaster- en kapittelkèrke sjtoon koarbanke langs beids kante van 't (preester)koar. De zietplaatse zint sóms ónderling gesjeie door ermleuninge. Sóms höbbe ze 'n misericorde (sjteune aan de ónderkant van de bank).
De ónderdeile van 't koargebed zint gebónge aan 'ne bepaald tied van d'n daag en van de nach, woa-op zie weure geleze. De tekste weure daorum getieje (getijden) geneump.
Achter of opzie in de kèrk, meistal op 'n verdeping kort bie d'n örgel, bevingk ziech ouch 'n koar of oksaal. Op dees plaats weurt door 't kèrkkoar of ander koar gezónge bie de versjillende vieringe.
