Krièmerwelsj
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
Krièmerwelsj ies 'ne andere naam veur bargoens. ‘Dae verköp krièmerwelsj’ of ‘dae kraomp ziech get d’r oet’ weurt waal ins gezag van emes, dae ónzin kalt of dae ziechzelf hièl gelièrd vingk en erudiet wilt euverkómme. Sóms ies dae kaal vraem of ónbegriepelik. Nederlandse equivalente vinge v’r in weurd es kramerslatijn, potjeslatijn, brabbeltaal, koeterwaals en double Dutch. Dat lètste haet nóg ’n twiède beteikenis es ‘safe sex’ oftewaal (dubbel) veilig vrieje mèt condoom en pil.
[bewirk] Krièmerwaereld
De oetdrökking krièmerwelsj (Nederlands: kramerwaals) sjtamp oet de krièmerwaereld. Dees handelaere gebruukde ónderein ’n eige (geheim) täölke, woamèt ze ziech ónderein koeste waarsjuwe of nuujts koeste doorgeve.
Me houw ulekrièmersj (’t Latiense ‘olla’ sjteit veur pöt, panne, kroeke), loemelekriemèrsj (loemel=vod), döppesjörgersj (döppe zint pöt en kump) en sjpenzelekrièmersj (sjpenzele= krièmerwaar).
[bewirk] Welsj
't Woord welsj (vraem, boetelands) en ander verwante vörme (waals, wellisch, wallisch, welsch, wales enz.) goon truuk op de naam van 'n keltische sjtam wonend in Gallia Narbonensis, die de Romeine es Volcae höbbe euvergenomme.
