Wagram
From Wikipedia
 |
Cheest artícul al è scrivüü in milanees, urtugrafía clàssica. |
Ses setimaan dopu del mezz disaster de Aspern-Essling, el Napuleoon a l'era prunt per tacaa ancamò. Inscii la fortificaa la soa baas, l'isula de Lobau in sul Danubi ben colegada cont la riva de sut in sò pusèss, e l'haa faa lanciaa on puntoon vers de la riva nort, poch kilometer a la sinistra de Aspern-Essling. Profitand del temp catiff la vanguardia la pasàva in su la riva nort senza che ij austriach, che ij eren in 155.000, fasèssen nagòtt. L'era el 5 de luj del 1809. Denter de una quaj d'ora el Bònapart el gh'aveva una bona area sòta control, che la podeva vess ancamò pusee granda si el Arciduca Carl l'avess minga mandaa i sò granadee a fermaj.
La matina dopu el Carl el tacava ancamò a Anderklaa sconfigend i Sasson del Bernadotte, che per quèla sconfitta l'è staa casciaa foeura del esercit francees. Sota l'atach austriach el pareva che el Napuleoon l'era a dree a perd anca el pont de Lobau, ma l'arriv dj rinforzi comandaa del Maresciall Massena e el lavor de l'artijeria de Lobau fermaver la vanzada e la bataja l'è tornada a vess favorevol aj francees cont el Maresciall Davout ch'el casciava indree l'ala sinistra austriaca.
El Maresciall Macdonald el tacava alora frontalment e dopu de ona bataja feroos el riessiva a tajaa la linea del Carl dividend in dù l'armada austriaca. La bataja la terminava con 80.000 omen perduu equament dj dù part, ma quatter dì dopu ij austriach ciamaven la paas.
