Laufen (Bezirk)

Us der alemannische Wikipedia, der freie Dialäkt-Enzyklopedy

Dialäkt: Baseldytsch

Dr Bezirk Laufe ("Laufetal") isch e Verwaltigseinheit im Kanton Basel-Landschaft (Baselbiet) mit em Hauptort Laufe. Dr Bezirk zellt 18'396 Yywooner (Ändi 2006).

Inhaltsverzeichnis 1 Gschicht 1.1 D Gryndig vom Kanton Jura 1.2 D Suech nochemene geignete Kanton 1.3 Dr Kampf Bärn gege Baselland 2 Politischi Gemeinde 3 extärni Verbindige

[ändere] Gschicht

[ändere] D Gryndig vom Kanton Jura

Dr Bezirk Laufe hett e wägselvolli jüngeri Gschicht. Ursprynglig hett er zum Kanton Bärn gheert. Wo 1979 dr Kanton Jura entstande isch, isch dr Bezirk Laufe e Exklave vom Kanton Bärn worde. Im Vorfäld vo dr Schaffig vom Kanton Jura hette d Laufetaler zem Kanton Jura drzuegheere kenne, wenn sie hette welle. Do aber im Kanton Jura franzeesisch gschnuurt wird und im Laufetal dytsch, hett me sich scho 1975 für e - provisorische - Verbliib bim Kanton Bärn entschiide.

[ändere] D Suech nochemene geignete Kanton

Vo 1975 bis 1994 isch heftig drumm gstritte worde im Bezirk, ob me bi Bärn blibt oder Aschluss amene andere Kanton suecht. Ändi 70er Joor hett me gluegt, zu wellem Kanton me wott goo, falls me wäggsle wurd. Zur Debatte gstande sin hauptsäglig s Baselbiet und Soledurn, will me zue dene beide Kanteen e gmeinsami Gränze gha hett. Au prieft worde sin dr Kanton Basel-Stadt und Aargau. Die beide hän aber nur Ussesyyterschongse gha, will s Laufetal denn immer no e Exklave gsi wäri. Basel-Stadt hett aber zimlig Interässi gha, will sii so eifach zu viel Land gho wäre, wo sii als Stadtkanton guet hette kennte bruuche. Das hän d Baselbieter aber gar nid luschtig gfunde. 1980 denn hän d Laufetaler noch meerere Volksabstimmige entschiide, ass si, falls sie wäggsle wurde, zem Baselbiet wäggsle wänn. Druffabe hett me mit em Baaselbiet verhandlet und - vorbehältlig de neetige Volksabstimmige im Laufetal, em Baselbiet und - will e Kantonswächsel alli Schwiizer agoot - au ir ganze Schwiiz - griens Licht vo de Baselbieter Regierig bikoo.

[ändere] Dr Kampf Bärn gege Baselland

Aber drno isch dr Kampf erscht so richtig losgange. Quer durchs Laufetal, durch die einzelne Deerfer, Ortsverein, Beheerde und Familie isch en tiefe Grabe gange vo de Pro-Bärner und de Pro-Baselbieter. Es hett vil beeses Bluet geh. Am 11.September 1983 hän sich d Laufetaler binere Stimmbeteiligung vo 93% mit 4675 Nei zue 3575 Jo gege en Aschluss ans Baselbiet entschiide. Do hett me gmeint, jetzt sigis ume. Aber drno hett me glii usegfunde, ass d Regierig vom Kanton Bärn haimlig em Abstimmigskomittee vo de Pro-Bärner e huffe Gäld zuegsteckt hett. Meereri Laufetaler hän druffabe bim Schwiizerische Bundesgricht, em heegschte Gricht vom Land, Stimmrächtsbeschwärde erhobe. S Bundesgricht hett denn entschiide, dass die finanziell Beyflussig vom Kanton Bärn unzuelässig gsi isch. Es hett aagordnet, dass me d Abstimmig wiederhole miess.

Und so isch s gliiche Theater, dr gliich Kampf, widdr vo vorne losgange. Am 12.November 1989 isch d Abstimmig wiiderholt worde. Do hän denn knapp d Pro-Baselbieter mit 4650 zue 4343 Stimme gunne. Druffabe hän d Pro-Bärner vorem Bundesgricht prozessiert, aber verlore. Noch enere ebefalls heiss diskutierte Abstimmig im Baselbiet 1991, ob me dr Bezirk Laufe yberhaupt wott - und d Baselbieter hän dytlig welle - und em dyttlige Joo vom ganze Schwiizervolk 1993 isch dr Bezirk Laufe am 1. Januar 1994 zum Baselbiet gwäggslet.

[ändere] Politischi Gemeinde

D Raiefolg vo de Gmainde richtet sich noch dr hochdytsche Schryybwyys.

[ändere] extärni Verbindige

• Artikel Laufen (Bezirk) im Historische Lexikon vo dr Schwiiz

Bezirk vom Baselbiet Arlise | Laufe | Lieschtel | Sissech | Waldeburg Kanton Basel-Landschaft | Bezirk vor Schwiiz | Gmeinde vom Baselbiet