Canal d'a Manga
De Biquipedia
A canal d'a Manga (en anglés English Channel; en franzés La Manche ) forma parti de l'ozián Atlantico y o comunica con o mar d'o Norte. Situato á l'ueste d'Europa, desepara o noreste de Franzia d'a isla de Gran Bretaña.
O suyo punto más estreito ye en o paso de Calais (tamién dito estreito de Dover), an nomás 34 quilometros de distanzia deseparan Dover d'o cabo franzés Gris-Nez.
Á lo surueste d'a canal, amán d'a costa franzesa d'a Normandía, bi ha unas islas ditas islas Anglonormandas, pertenexiens á lo Reino Unito. A isla franzesa d'Ouessant, debán d'a costa bretona, marca o estremo ozidental d'a canal. En a zona sur d'a canal i destaca la peninsula de Cotentin.
O nombre aragonés d'a canal probiene d'o franzés, en que la Manche quiere dizir "a manga". Iste mesmo senificato ye o que s'ha conserbato en l'alemán (Der Ärmelkanal), en portugués (Canal da Mancha), en italiano (la Manica), en catalán (la Mànega) u mesmo en esperanto (Manika Markolo), á diferenzia de l'anglés, que le clama "canal anglés" (English Channel) u o neerlandés, que en dize simplamén "a canal" (Het Kanaal); o español, curiosamén, adauta la forma franzesa nomás foneticamén pero sin de conserbar-ne o senificato orichinal, ya que Canal de la Mancha no fa referenzia á denguna manga.
