Ilesia Catolica
De Biquipedia
A Ilesia Catolica Romana ye a denominazión más gran d'o cristianismo, con 1.100 millons de miembros. O catolicismo diz estar a ilesia orichinal cristiana, establita por Chesucristo. Tamién establexe l'orichen d'a suzesión apostolica d'o Papa con San Pietro e os apostols. O Conzilio d'o Baticano Segundo, en o Decreto d'a Ilesia se declaró que "a unica Ilesia de Cristo, que profesa estar una, santa catolica e apostolica en o credo" tién a plena reyalizazión en a Ilesia Catolica, gubernata por o suzesor de Pietro, e por os bispes en comunión con er. O "Suzesor de Pietro" ye o Papa, autualment, Benedet XVI.
Istoricament, a Ilesia Catolica ye una d'as instituzions más grans e con mayor continuidat que encara existen. Tién una organizazión cherarquica en a cuala o clergat ordenato ye dibidito en ordens de bispes, presbiters e diaconos. O mundo ye dibidito en 2.755 diozesis (l'año 2004), dirichitas por un bispe responsable d'os fiels de l'aria. A diozesis de Roma ye a prenzipal, ya que o bispe d'ista, ye o Papa, suzesor de san Pietro, o cape d'os apostols.
A Ilesia Catolica Romana tién miembros en cada país d'o mundo. Se considera aber estato establita per Chesucristo ta reyalizar a salbazión d'as almas, o que fa por meyo d'as amostranzas e por l'almenistrazión d'os sacramentos os cualos dan grazia á lo creyent. O magisterium d'a Ilesia basa as amostranzas en a escritura e en a tradizión apostolica. A Ilesia tamién promuebe o monastizismo e as prauticas relichiosas d'a orazión, l'ayuno, a almosna, as penitenzias, o pelegrinache e la meditazión.
D'alcuerdo á lo catezismo d'a Ilesia Catolica, o suyo proposito ye "estar o sacramento d'a comunión interna de l'ombre con Dios".
