Imperio britanico
De Biquipedia
Se conoxe como Imperio britanico á las tierras que pendeban politica e economicament d'a Gran Bretaña. O momento de mayor importanzia d'o Imperio estió á prenzipios d'o sieglo XX, probablement entre 1890 e 1910, cuan teneba una poblazión d'entre 400 e 500 millons de presonas e bels 33 millons de quilometros cuadratos, lo que senificaba alto u baxo una cuarta parti d'a poblazión mundial e dos zinquenas partis d'as terras emerxitas.
O Imperio se desarrolló mientres d'uns 300 años, á trabiés d'una serie de fases relazionatas con o comerzio, a colonizazión e a conquista en las que estendilló as suyas mugas, antimás de periodos d'autibidat diplomatica.
Grazias á lo Imperio britanico a teunolochía, o comerzio, o idioma anglés e o gubierno britanicos s'esbandioron por tot o mundo. A exemonía imperial contrebuyó á lo espeutacular creximiento economico de Gran Bretaña e á lo peso d'os suyos intreses en o eszenario mundial.
O primero en emplegar a esprisión "Imperio britanico" estió lo dotor John Dee, astrologo, alquimista e matematico d'a reina Isabel I d'Anglaterra.
Bels territorios que han formato parti d'o Imperio britanico son: Irlanda, Estatos Unitos, Canadá, Chamaica, Australia, Nueba Zelanda, India, Malaisia, Echipto, Surafrica, Nicheria, Camerún, Kenia, Hong Kong, Iraq, Chipre, Chibraltar u Menorca entre muitos atros. Güé en día bels d'istos territorios, ya independients, reconoxen os suyos lazos con Gran Bretaña á trabiés d'a Commonwealth.
