Maya
De Biquipedia
Os mayas yeran un pueblo ubicato cheograficamén en o sur de Mexico y o norte d'America Zentral, establiendo una d'as culturas mesoamericanas mas importans antis d'a plegada d'os españols. Güe en diya, encara bi ha millons de deszendiens d'os mayas que biben en ista redolada y charran diferens dialeutos d'a luenga maya.
[editar] Mosica maya
A mosica maya s'alazeta en dos tipos de instrumentos: d'aire (chuflez, chuflainas y caragols) y de percusión (xilofono, coscaranas de tortugas y gayatas de madera). As gayatas de madera son uecas y en tienen estreitos pasaxes interiors que fan sonar as simiens en o suyo interior. No se conoxió mosica feita con instrumens de cuerda. No conoxemos güé muitos d'os instrumens feitos en madera ya que desaparixioron á o paso d'o tiempo y a umedat.
[editar] Pintura
Prauticaron a teunica á o fresco y a begatas plasmaron a prespeutiba, pues a mayor parte d'as begatas pintaron personaches de canto. Os personaches pequeños son representazions de presonas alechadas, de menor rango sozial o esclabos. Bi eba barias capas de estuco con murals que no nezesariamén repiten a decorazión. Tamién aparixen manos en positibo u negatibo sopre os edifizios de sinnificato desconoxito. Os tonos preferitos son o royo y l'azul.
[editar] Matematicas
Igual que atras zebilizazions mesoamericanas, os mayas emplegaban un sistema de numerazión de base 20 y de base 5. Tamién os mayas pre-clasicos (u os suyos predezesors, os olmecas), desarolloron independientemén o conzeuto de zero arredol de l'año 36 aC (iste ye o primer uso documentato de un zero como lo conoxemos güei en diya, aque os babilonios muito antis eban desarrollato una sustituzión á o mesmo).
