Mezmut
De Biquipedia
Mezmut ye o nome como en aragonés meyebal conoxeban á lo mobimiento relichioso al-Muwahhidun, u Almohade por lo ligallo que teneban con la confederazión mezmut u mezmut.
O mobimiento al-Muwahhidun amanixió en l'Atlas marroquín en lo sieglo XIII como reazión á la relaxazión relichiosa de los almorabez, que encara que s'eban estendillato muito por Berberia e Al-Andalus, eban fracasato en lur prebatina de enfortir los estatos musulmans e d'aturar l'abanze cristián en la Peninsula Iberica.
En reyalidat ye un feito constant en la Istoria de l'Islam que dezaga d'un mobimiento integrista en bién atro de nuebo cuan se relaxa lo que i eba enantes. Á los mezmuz los seguirían los Benimarins. Ye lo que Marvin Harris clama una rebitalizazión relichiosa, u cuan una relichión como estituzión se rebiscola como respuesta á demandas sozials.
Al-Muwahhidun, sennifica «los unitarios», denominazión que fa referenzia á que Tawhid, lo suyo fundador, insistiba muito en l'absolita unizidat de lo dibín.
En l'Al-Andalus, los musulmans natibos u muladins no yeran d'alcuerdo con las dotrinas integristas de los Almorabez u de los Mezmuz, pero á begatas las zercustanzias los feban aliniar-sen con ellos contra un enemigo común. Cuan los mezmuz sustituiban á los almorabez en lo dominio de Berberia lo rei Lop, un rei taifa de Murzia que no yera ni arabe ni berber, sino muladín, consiguió dominar la més gran parte de lo sureste de la Peninsula Iberica e resistir por muito tiempo l'abanze mezmut.
Lo prinzipio de la fin de los mezmuz en Al Andalus estió en 1212 con la batalla de las Landas de Tolosa, on los exerzitos de los reis d'Aragón, Castiella e Nabarra benzioron á los mezmuz.
