Miguel Servet
De Biquipedia
|
||||||||||||
Miguel Servet. O suyo nombre autentico yera Miguel Serveto y Conesa, dito "Rebés". Tamién clamato Miguel de Billanueba, Michel de Villeneuve u, en latín, Michael Servetus (29 de setiembre de 1511 - 27 d'otubre de 1553), anque a calendata esauta de naximiento ye inzierta. Teologo y zentifico aragonés, naxito de Billanueba de Sixena.
Os suyos intreses abastoron muitas zenzias: l'astronomía y a metiorolochía, a cheografía, a churisprudenzia, a teolochía y o estudio d'a Biblia, as matematicas, l'anatomía y a merezina.
Publicó barios libros polemicos como De Trinitatis erroribus (D'os Errors arredol d'a Trinidá) en 1531 o cualo negaba o dogma d'a Santisma Tinidá, establito en o Conzilio de Nizea I y que dize que Pai, Fillo y Esprito Santo son un mesmo Ser. Isto li fazió aber frontinazos tanto con cristians catolicos romanos como con cristians protestans.
Mientres muitas añadas abió de fuyir a Franzia, an bibió con a identidá de Michel de Villeneuve. Ya en 1546 escribe Christianismi Restitutio (A torna d'o Cristianismo) que nimbia ta Calbino, con quí ya eba tenito relazión antis en París. Iste o leye y li combida á leyer o suyo libro Institutio religionis Christianae (Institución de la Religión Cristiana), que eba estato publicato en 1536. Servet o leyió, fendo asabelas anotazions creticas en o marchin d'as fuellas y tornando-li atra begata la copia correchita ta Calbino, o cualo no li cuacó y dizió á Sevet que si meteba os suyos piez en a ziudá de Chinebra no'n salirba con bida d'astí.
En un biache de Servet enta Italia, pasaba por Chinebra y fazió una chicota estada. Estió reconoxito en a ilesia an predicaba Calbino, detenito y chuzgato por ereche por a suya negazión d'a Trinidá y a esfensa d'o baltismo en a edá adulta. Estió condenato á morir cremato en a foguera con o suyo libro o diya 26 d'otubre de 1553.
