Nazionalidaz d'España
De Biquipedia
Nazionalidat istorica [1]u, simplament, nazionalidat [2] son termins politicos que s'ha benito emplegando á España dende a reinstaurazión democratica d'o Estato ta referir-se á ixas comunidaz autonomas que tienen un sentimiento nazional u de fortal identidat colectiba, lingüistica u cultural, cuan per a istoria cuan per un sentimiento cheneralizato entre a ziudadanía d'a comunidat. Altros termins á ixa fin conzebitos en propuestas á mientres d'a VIII lechislatura son estatos realidat nazional [3] e caráuter nazional [4].
Es termins tienen una difízil entrepretazión legal. En a bichent Constituzión española de 1978 se fa serbir a esprisión: «as nazionalidaz e rechions que entegran [...] a nazión española». O termín «nazionalidat» pareix que s'emplega ta no equiparar as comunidaz con a «nazión», bocable reserbato ta España (seguntes bels churistas esclusibament e seguntes uns altros no). A mayoría d'os ponents d'a Constituzión entrepretó, en o curso d'o debate que se'n fazió en o Congreso d'os Deputatos, que o conzeuto constituzional «nazionalidat» ye sinonimo de «nazión».
A Constituzión de 1978 reconoix a esistenzia de nazionalidaz e rechions, e lis atorga l'autonomía sin establir diferienzias almenistratibas entre ellas:
- «A Constituzión s'alazeta en a indisoluble unidat d'a Nazión española, patria comuna e indibisible de toz es españols, e reconoix e guarenzía lo dreito ta l'autonomía d'as nazionalidaz e rechions que la entegran e a solidaridat entre totas ellas.» (Constituzión Española de 1978)
Un altro caso reconoixito en a Constituzión ye o d'as rechions diferenziatas istoricament á lo mesmo nibel que as ditas nazionalidaz. Ye o que ocurre con Nabarra, que poseye un grau más gran d'autonomía que no as altras comunidaz autonomas, en birtut d'os dreitos istoricos reconoixitos á los territorios forals á la disposizión adizional primera d'a Constituzión.
Actualment, as comunidaz autonomas reconoixitas como «nazionalidaz» en os suyos estatutos son:
- Andaluzía (1981 e 2007) - nazionalidat istorica
- Aragón (1996 e 2007) - nazionalidat istorica
- Canarias (1996) - nazionalidat
- Cataluña (1979 e 2006) - nazionalidat; (en o preámbol) nazión, reyalidat nazional
- Comunidat Balenziana (1982 e 2006) - nazionalidat; nazionalidat istorica
- Galizia (1981) - nazionalidat istorica
- País Basco (1979) - nazionalidat
[editar] Referenzias
- ↑ Estatuto d'Autonomía d'Aragón (reformato en 2007) ([1] PDF).
Estatuto d'Autonomía d'a Comunidat Balenziana (reformato en 2006, edizión d'as Corz Balenzianas) ([2] PDF).
Reforma d'o Estatuto d'Autonomía d'as Islas Balears ([3]). - ↑ Estatuto d'Autonomía d'Andaluzía de 1981 ([4])
Estatuto d'Autonomía de Cataluña de 2006 ([5]), Reforma d'o
Estatuto d'as Islas Canarias ([6]) - ↑ Reforma d'Estatuto d'Autonomía de Andaluzía, Congreso d'os Deputatos ([7] PDF)
- ↑ "Alcuerdo sopre criterios ta un Estatuto [d'autonomía de Galizia] de toz", siñato per o Partito Sozialista de Galizia e o Bloque Nacionalista Galego ([8])
