Pietro V d'Aragón
De Biquipedia
|
||
| Informazión | ||
|---|---|---|
| Rei e conte en |  Aragón e Barzelona |
|
| dende | 1464 | |
| dica | 1466 | |
| Prezedito por | Enrique IV de Castiella | |
| Suzedito por | Renato I de Nápols | |
| Naximiento | 1429 | |
| Muerte | 1466 | |
Pietro V d'Aragón u Pero V d'Aragón, dito o Condestable de Portugal (1429 - †Granollers, 1466) estió rei d'Aragón e conte de Barzelona (1464-1466) mientres d'a luita contra Chuan II. Suzedió á Enrique IV de Castiella.
Fillo de Pietro de Portugal, duque de Coimbra e rechent de Portugal, e d'Isabel d'Urchel e d'Aragón, filla de Chaime II d'Urchel, un d'os pretendients á lo tron aragonés mientres d'o Compromís de Casp.
En 1443, mientres o suyo pai yera rechent, iste lo nombra contestable de Portugal, esdebenindo doncas en a masima autoridat melitar d'o reino dimpués d'o rei. En 1444 estió nombrato tamién caballero e Gran Mayestro d'a Orden d'Avis, a más important de Portugal. En 1448, á l'arribar o rei Alifonso V á la mayoria d'edat, o suyo pai abió de dixar a rechenzia. O nuebo rei, influyenziato por Alifonso I de Braganza, enemigo personal de Pietro de Portugal, anuló totas as lais promulgatas mientres d'a rechenzia d'iste, e en 1449 Alifonso V le declaró a guerra e lo redotó en a baralla d'Alfarrobeira. Pietro de Portugal murió en a batalla e Pietro lo Condestable s'abío d'esiliar en Castiella.
En 1454, Pietro se reconcilló con Alifonso e tornó á Portugal á on se le tornoron os suyos biens e cargos. En 1458 luitó chunto á lo rei en a conquista d'Alcacer Ceguer e en la de Tancher en 1460.
En 1463, as institucions catalanas d'a Corona d'Aragón, que se trobaban en guerra zebil con o rei Chuan II, le ofrexioron a corona. En 1464, Pietro estió proclamato conte de Barzelona por o Consello de Ziento. Reina nomás en Cataluña. No reinó en Balenzia, á on continaba reinando Chuan II. Contrimostró estar poco ábil en a luita contra Chuan II e iste prenió Lleida, Vilafranca del Penedès, Igualada, Cervera e Tortosa e redotó á Pietro en Calaf, en 1465.
Pietro murió d'una malotía en Granollers o 1466 e estió apedecato en Santa Maria d'o Mar.
Dimpués d'a suya muert, as instituzions catalanas ofrexioron a corona á Renato I de Nápols que lo suzedió.
| Predezesor: Enrique IV de Castiella |
Rei d'Aragón Conte de Barzelona 1464-1466 |
Suzesor: Renato I de Nápols |
