Remiro II d'Aragón
De Biquipedia
|
||
| Informazión | ||
|---|---|---|
| Rei en |  Aragón |
|
| dende | 1134 | |
| dica | 1137 | |
| Prezedito por | Alifonso I | |
| Suzedito por | Peronella d'Aragón | |
| Naximiento | 1075 | |
| Muerte | 16 d'agosto de 1157 | |
Remiro II dito lo Moncho estió rei d'Aragón entre 1134 y 1137
Dende que yera mui choben pasó su vida dedicado a la Iglesia, primero como moncho en o monesterio franzés de San Ponze de Tomeras; dimpués como abate de San Pietro lo Biello en Uesca y, de zaguero, como bispe de Roda-Balbastro.
O suyo chirmán, o rei Alifonso I, fazió erederas d'os suyos reinos á las Ordens Melitars, pero nadie quereba cumplir dito testamento y os nobles aragoneses, reunitos en Chaca reconoxioron á Remiro como rei. Os nabarros eslexioron á Garzía Remíriz. En ixe inte Ramiro yera bispe de Roda-Balbastro, pero abió d'ocupar o tron.
Anque no eba esperenzia politica, sefocó con esito barias rebueltas mientres o suyo reinato, que solo duró tres añadas, entre 1134 y 1137.
En o Reino d'Aragón eba barios bandos nobiliarios que luitaban por adubir mayors cotas de poder y de riqueza. Ixos bandos s'enfrentoron entre ers aprobeitando lo cambeo de monarca. En una d'ixas letigas Remiro II cuasi perdió lo tron, por lo que abió que cubillar-se en Besalú en 1135. Á la suya tornada soluzionó lo poblema mandando decapitar á barios nobles que eban enrestito una carabana de musulmans en tiempo de tregua. Iste suzeso dió orichen á la falordia de "A campana de Uesca".
Se casó lo diya 13 de nobiembre de 1135 en a catedral de Chaca con Agnés de Poitou, una noble biuda franzesa. D'iste matrimonio naxió a eredera, Peronella o diya 11 d'agosto de 1136.
Prometió á la suya filla Peronella, con un año d'edá, con Remón Berenguer IV, conte de Barzelona. O casorio se siña en Balbastro o 11 d'agosto de 1137. O 13 de nobiembre d'ixa mesma añada, Remiro II abdicó lo reino en Remón Berenguer, anque no pas a dinnidá reyal. Dende ixe inte D.Remón, con tetulo de prenzipe d'Aragón y conte de Barzelona, s'encarga d'os dos estatos. En o mes d'agosto de 1150 o conte Remón Berenguer y doña Peronella se casoron en Lleida.
D'ista traza, Remiro cumplió a misión de salbar a monarquía.
Os zaguers diyas de don Remiro transcorrioron entre San Pietro lo Biello de Uesca y San Úrbez de Sarrablo (Uesca). Morió en Uesca o diya 16 d'agosto de 1157 y estió enterrato en a capiella de San Bertolomé de San Pietro lo Biello de Uesca.
| Predezesor: Alifonso I |
Rei d'Aragón 1134 – 1137 |
Suzesor: Peronella d'Aragón e Remón Berenguer IV |
