Rutilismo
De Biquipedia
O rutilismo ye a denominazión tecnica que designa el pelo rusio u royo intenso, caracterizato per uns altos nibels d'un pigmento royisco dito feomelanina e d'uns relatibament baixos nibels d'o pigmento escuro dito eumelanina.
A poblazión umana de pelo rusio ye muito minoritaria, esmata en menos d'un 2%.[1]. Ye a color de pelo menos comuna n'o mundo, trobando-se prinzipalment en chent de l'ueste e d'o norte d'Europa (sopre tot á tierras con luengas zeltas como Escozia e Irlanda), asinas como n'os suyos deszendients d'altros cabos d'o mundo, e ya en muito menor grau á altros puestos d'Europa, Asia e Africa.
Amés de n'os umans, o rutilismo tamién puet trobar-se en altros mamifers, como los esquiruelos, os arangutans, belas espezies de raposa, etz.
Contenius |
[editar] Chenetica
A color rusia distintiba ye causata per a gran cantidat d'o pigmento dito feomelanina, sumata á una relatibament radita cantidat d'o pigmento escuro dito eumelanina. O pelo que tien feomelanina e eumelanina amuestra una color caoba.
Seguntes se descubrió en 1997, pareix que o pelo rusio ye asoziato con o rezeptor de melanocortina 1, que se troba n'o cromosoma 16. Igualment s'asozeya con una piel clara e sensibilidat á la luz ultrabioleta. O mesmo chen rezesibo gosa d'ir acompañato de pecas, encara que muita chent de pelo rusio no en tien.
O erenzio chenetico de pelo rusio s'amana t'o que os chenetistas describen como modo rezesibo autosomatico, o que significa que os pais de ninnos con pelo rusio pueden portiar o chen pero no tener-lo éls.
Se crey que l'orichen d'o chen asoziato con o rutilismo puet estar entre 50.000 e 100.000 años tazaga.
Tamién pareix que cuan només bi ha que una copia d'alelo de pelo rusio, o pelo puet mesturar-se con l'altra color de pelo, o que fa que en surtan diferents tipos de pelo rusio, amanando-se t'o royo (panizo) u t'o pardo (caoba).
T'o fenotipo d'o pelo rusio, os alelos Arg151Cys, Arg160Trp, Asp294His e Arg142His n'o MC1R apareixen como rezesibos.[2]
Ye tamién posible que o chen HCL2 n'o cromosoma 4 sía relazionato con o pelo rusio.[3][4]
[editar] Aspectos culturals
A rareza d'ista color de pelo ha feito que en muitas culturas s'aya lobato, temito u ridiculizato la chent que la teneba.
D'entre as creyenzias e estereotipos que per un regular se'n ha feito, i ye o d'un caráuter carrañoso, fogoso e sensual. N'a Edat Meya, se plegó ta asoziar o pelo rusio con o diaple, e unito á uns güellos berdes, s'acumulaba á lo feito d'estar broixa.
Una tradizión entre os astrologos diz que, á l'ora que naix una persona de pelo rusio, o planeta Marte tien més probabilidaz d'estar o planeta que se debante per l'orizont de l'este que no con a resta d'a poblazión en cheneral.
Bels pintors, como Tiziano, Botticelli u Klimt, han amostrato una clara faszinazión per o pelo rusio, como se bey en muitas d'as mullers d'as suyas pinturas. Un d'os personaches de pelo rusio més conoixitos estió lo pintor Vincent Van Gogh.
N'os tiempos d'a era isabelina, i abió una actitut positiba ent'o pelo rusio, que se metió de moda, pos a reina Isabela I d'Anglatierra en teneba.
N'os tiempos actuals, belas personas zelebres de pelo rusio fan publizidat de tintes de royura intensa, e diferents modas e culturas d'o mundo troban atrayent a rusitura d'o pelo.
[editar] Se beiga tamién
- Pelo royo
- Melanina
[editar] Referenzias
(En anglés)
- ↑ Red Alert! Washington Post: Calandata orichinal: 19-03-2002. Aczedito en 06-02-2007.
- ↑ Harding, Rosalind M. et al. Evidence for Variable Selective Pressures at MC1R American Journal of Human Genetics , 2000 April; 66(4): 1351–1361.
- ↑ HGNC Symbol Report:HCL2
- ↑ Major locus for red hair color linked to MNS blood groups on chromosome 4. Eiberg H, Mohr J. University Institute of Medical Genetics, Copenhagen, Denmark.
