Sedetans
De Biquipedia
Os sedetans estioron un pueblo de cultura iberica d'o sieglo III aC que bibiban en a Bal Meya de l'Ebro, con aria zentrata en o Baxo Martín, Andorra-Sierra d'Arcos, Campo de Belchit, Ribera Baxa de l'Ebro y arredols más que más a lo sur de l'Ebro.
Prenen lur nome como muitos pueblos ibers d'a capital suya, Sedeis, Sedeisken, conoxita por as inscripzions monetals. Encara no ha estato localizata, anque s'han proposato Sastago por parexito fonetico y Zaila por o imporant despoblato iberico que bi ha (Cabezo d'Alcalá). Miguel Beltrán Lloris interpreta en base a cantidaz de monedas en diferens chazimientos que o Cabezo d'Alcalá yera l'antiga Beligion.
Atras ziudaz importans d'o terreno sedetano estioron Kelse (en Biliella d'Ebro y Exelsa), que emitió dinars d'archent, Salduie (a man de Chuslibol), Ildukoite (Oliet), Bernaba (Azuara), y Damaniu (no localizata).
Seguntes a bisión cheneral de muitos autors mugaban á lo norte con os suesetans y con os ilerchez, con os ausetans á l'este, con os edetans á lo sureste y con os zeltibers á lo surueste.
A relazión con os edetans ye polemica, car s'ha proposato que estasen un mesmo pueblo u que tenesen orichen común. O parexito de nome no ye sennificatibo porque os edetans prenen nome d'Edeta (Liria), y os sedetans de Sedeis.
Aprobeitaban os recursos flubials d'os ríos pa fer una agricultura de regadío. Tamién comerziaban con atros pueblos porque n'ixa epoca l'Ebro yera una ruta comerzial.
A moneda sedetana teneba como representazions un chinet con palma y una capeza con tres delfins.
Se romanizoron pronto como atros ibers d'a costa y Bal de l'Ebro. Bels sedetans s'alistoron en l'exerzito román y interbinioron en Italia en a guerra sozial, como demuestra o bronze d'Ascoli.
