Zine d'intriga
De Biquipedia
|
|
|||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|
 |
|||||||||||||||||||
|
|
|||||||||||||||||||
|
|||||||||||||||||||
|
|
|||||||||||||||||||
|
O zine d'intriga, tamién dito de suspenso u con l'anglizismo thriller, ye a denominazión usata ta un amplo chenero zinematografico, que abraca sozcheneros diferens que á ormino s'acaballan, e que per necso d'unión tienen una trama con elementos e claus caracteristicos, a resoluzión d'os cuals mantién en suspenso lo espectador.
As zintas d'intriga comparten á ormino un ritmo rapedo, con aizión frecuén e, en muitos casos, con protagonistas destinatos á trebullar es procheutos de billanos més poderosos u dar fin á conflictos importans. D'entre es recursos que gosan á apareixer, ibi ha suspenso, bayos falsos ta despistar o espectador e finals irresueltos ta futuras continazions.
O guión de muitas d'istas zintas gosa á estar l'adaptazión de bela obra literaria d'as tamién ditas nobelas d'intriga u de suspenso.
[editar] Sozcheneros
No puet fablar-se d'una dibisión clara d'as zintas d'intriga en sozcheneros, si bien, seguntes os elementos d'altros cheneros que i apareixen, á menuto pueden encaixar-sen, d'entre altros, n'os siguiens estallamientos:
- Zintas d'espías, n'as cualas o protagonista gosa á estar un achén d'o gubierno que ha d'acometer aizions biolentas cuentra un altro gubierno u organizazión. En son bels ixemplos: The 39 Steps (Os 39 escalerons), d'Alfred Hitchcock; The Manchurian Candidate (O candidato de Manchuria), de John Frankenheimer; The Spy Who Came in from the Cold (O espía surtito d'o fredo), de Martin Ritt; u Spy Game (Chuego d'espías), de Tony Scott.
- Zintas d'intriga sicolochica, n'as cualas ye tan u més importán o conflicto mental e emozional que no l'aizión, si bien per un regular a resoluzión á la fin ye biolenta. En son bels ixemplos: Abre los ojos (Ubre os güellos), d'Alejandro Amenábar; u Memento (Recordatorio), de Christopher Nolan.
- Zintas d'intriga terrorifica, diferens d'as zintas de terror en que, més que no los elementos u feguras de terror, o que i prima ye la trama de suspenso. En son ixemplos: Psycho (Sicosis), d'Alfred Hitchcock; The Collector (O Coleczionista), de William Wyler; u Saw, de James Wan.
Manimenos, ye difízil d'establir una berdadera buega entre cheneros. Asinas, a mayoría de zintas combinan una serie d'elementos de cheneros diferens. Per ixemplo, o filme Seven, de David Fincher, ye una zinta d'intriga con elementos sicolochicos, poliziaco-criminals e de terror.
D'entre os muitos directors con obras en iste chenero, en descolla lo britanico Alfred Hitchcock, qui ha rezebito en ocasions a embotata de "chenio d'o suspenso".
