Alf Poier
Aus Wikipedia
 |
Der Àrtikl is im Dialekt „Owaöstareichisch“ gschriem worn. | |
Da Alf Poier (* 22. Februar 1967 in Judnburg, Steiamoak) is a östareichischa Musika, Kabarettist, Maler, Philosoph und Autor. Wengam eignoatign Stil vu seim Kabarett und seine Büidln kau ma eam an Surrealistn nenna.
[dro werkln] S'Lem
Söiba sogt a, dass ea "müttalichaseits geboan" woan is, wos ma eam a glaubn deaf. Noch da Schui (1987-1995) hod ea untaschiadlichste Sochn ausprobiat, so woa ea unta aundarem Nochtwächta, Köina, Empfaungsdame, Obflussreiniga und eafoigreicha Laungstrecknläufa. 1995 hod ea in Graz beim Kleinkunstvogel sein erstn Auftritt ois Karabettist ghobt und is glei Zwoata woan. Seithea hod ea einige Programme (unta åndam Zen, Mitsubischi) außabrocht und a Buach gschrim (Mein K(r)ampf).
Bekaunnt woan is ea in gaunz Eiropa zweng seina Teilnauhme am Eurovision Song Contest 2003. Mit Weil der Mensch zählt, am Liadl im Steira Dialekt, in dem klane Haserl und die Frau Holle voakemman, hod ea de gaunze Vaaunstoitung vaoascht und is dabei sogoa nu guat aukemma. Ea hod in 6. Plotz erreicht, wofia ea si gschaumt hod, weil ea Easta oda Letzta wean woit.
2005 woit ea wieda mitmochn, is oba am Abstimmungssystem vum ORF gscheitert. Ea hätt fost doppit so vüi Stimmen ghobt wia de "Siega", oba de hom weniga Gwicht ghobt.
[dro werkln] Marknzeichn
S'Karakteristische vu eam san de eignoatign Büida, de oft Woatspiele (zum Beispüi Reh-konvaleszent) zum Thema hom. Aa total unmögliche Sochn wia Päpste beim Fachsimpeln san in seim Programm.
[dro werkln] Auszeichnungen
- 1998 Salzburger Stier: Besta östareichischa Nochwuchskabarettist
- 2000 Deutscher Kleinkunstpreis: Kategorie Kloakunst
- 2000 Prix Pantheon: Jurypreis Frühreif & Verdorben
- 2000 Deutscher Comedypreis: Besta Neiling
- 2002 Österreichischer Kabarettpreis Karl: Hauptpreis fia "Mitsubischi"
