Euregio
Aus Wikipedia
 |
Der Àrtikl is im Dialekt „Ståd-Såizburgarisch“ gschriem worn. | |
A Euregio oda Europaregion oda Euroregion is a Organisazion, wo zwà oda mehrane benåchbate Gebiedskörpaschåftn (zum Beispüi Provinzen, Greise oda Bundeslända) vo zwà oda mehrane vaschiedene europäische Stååtn zsåmmårwatn. Dé håm åwa kàne politischn Kompetenzn oda håid netta soichane, wås eana de Gebiedskörpaschåftn üwadrång, de wås drã beteiligt san.
A Euregio is dazua då, daß s'de gemeinsåmen Intaressn vo de beteiligtn Gebiete fördat und in Austausch zwischn eana leichta måcht. Se soin de Zsåmmenårwat üwa d'Grenzn auße stärka måchn und soichane Gebiete, de wås in àn Lånd an da Grenz lieng, béssa fördan. De Begriffe san néd glår definierd, déswéng gibt's vaschiedene Rechtsformen, nämli Zsåmmenschlüsse nåch'n öffntlichm Recht, nåch Privàtrecht oda à âfåch netta a so, ohne fixe Rechtsform. Da Nåm Europaregion kummt vo da Madrida Konvenzion vom Europaråd vo 1980 üwa d'grenzüwaschreitende Zsåmmenårwat zwischn de Regionen vo Europa.
