Grichtsbezirk

Aus Wikipedia

Der Àrtikl is im Dialekt „Ståd-Såizburgisch“ gschriem worn.

A Grichtsbezirk, dés is de Géngd, fir de wås a bestimmtes Gricht vom Ort her zuaständig is. Wåmma vo an Grichtsbezirk rédt, mànt ma meistns dé Géngd, fir de wås a Gricht in da niadrigstn Hierarchiestufn vo da orntlichn Grichtsbårkeid zuaständig is. Des warad in Östareich s'Bezirksgricht (davo gibt's åis zsåmm 141). In Bayan hàßt so a Gricht Åmtsgricht, und davo gibt's åis zsåmm 72 im gånzn Freistååd. In Südtiroi dagéng gibt's nur a âzigs orntlichs Gricht in Bozn, åiso is gånz Südtiroi sozusång da Grichtsbezirk Bozn.

Daném rédt ma à månkmåi vo Grichtsbezirke, wåmma dé Zuaständigkeitsbereiche vo hechane Gricht mànd. Dé san dånn in da Régü fir de Grichtsbezirke vo mehrare Grichte vo da untan Stufn zuaständig.

In Östareich san â Stufn üwa de 141 Bezirksgrichte d'Låndesgrichte zuaständig, vo denan åis zsåmm 20 gibt, und nu â Stufn drüwa de vier Owalåndesgrichte in Gràz, Innschprugg, Linz und Wean. In Bayan gibt's üwa de 72 Åmtsgrichte nu 22 Låndgrichte und drüwa de drei Owalåndesgrichte in Bamberg, Minga und Nürnberg.

Bei de owastn Grichte braucht ma néd extrig vo an Grichtsbezirk rén, wei de san eh åiwei fir's gånze Lånd zuaständig. In Östareich rédt ma déswéng bsundas oft vo Grichtsbezirke, wei de gressan politischn Bezirke af mehrane Grichtsbezirk (vom Bezirksgricht) afdeud san und ma dånn dé Grichtsbezirke åis Untateilung hernimmt.

De Régü, daß so Grichte åiwei nur fir eanan Grichtsbezirk zuständig san, güit åwa néd åiwei. Im Prozessrecht gibt's an Haufn Régün, wo a Ångléngheid af a åndas Gricht üwadrång wern kã, oda à, wås ma duad, wånn's sunst går kàn inländischn Grichtsstånd gawad.