Holledau

Aus Wikipedia

Der Àrtikl is im Dialekt „Mingarisch“ gschriem worn.

D' Holledau is a Kultualandschaft mittn in Baian in de Regierungsbezirk Obabaian und Niedabaian. Vo de Landkreise Pfaffahofa, Freising, Kelheim, Landshuat und Eichstätt gheat überoi a Drum zur Holledau. Außnrum lieng Ingoiståd, Kelheim, Landshuat, Freising und Schromhausn. De ganze Flächn vo da Holledau hod rundummadum 2400 Quadratkilomädda.

D'Holledau is des gräßte Hopfaobaugebiet auf da Wêît, momentan (2006) baun 1251 Hopfabauan auf üba 14.000 Hektar an Hopfa o.

[dro werkln] Hopfabau

[dro werkln] Gschicht

Das in dera Region Hopfa obaud werd, is seitm 8.Johrhundad belegt. De Ortschaftn Geisnfeld und Gründl bei Nandlstodt beanspruchan olle zwoa, dass sie as Ursprungsgebiet vom Hopfaobau san. Bis zum Ofang vom 19. Johrhundad war de Gegnd um Spoit bei Nürnberg as Hauptobaugebiet in Bayan. Erscht noch da Bauanbefreiung warn ab 1848 de Voraussetzungen dafia erfuid, dass in da Holledau mehra Hopfa obaud werd. Desweng is da Erdrog vo 1500 Zentna im Johr 1815 auf mehra wia 75.000 Zentna im Johr 1865 gstieng. Seit 1912 is d'Holledau as gräßde Hopfaobaugebiet auf da Wêît.

[dro werkln] Rationalisierung

Damid si da broggde Hopfa lenga hoid', san de Droin auf so gnennde „Horden“, oda aa "Reida" zum Driggen an da Luft aufgschicht woan. Am End' vom 19. Johrhundad hod da Woinzacha Zimmara Max Eder a zwoasteggige Darr entwicklt. Da untn ogfeiade Ofa hod a Heizspiroin g'waarmd, de dann de om liegadn Droin drigged hod.

Bis zum Ofang vom 20. Johrhundad is a jäde oanzäine Rem an na Hoizstang naufg'wachsn. Kurz voam erschtn Wäidgriach san dann d'Hopfagårtn auf Drohtg'rüssda umgstäid woan und bis 1930 war de Umstellung obg'schlossn.

Um de Droina vo de Rem rozumgriang, san in Spitznzeitn fast 200.000 so g'nennde "Hopfazupfa" aus de strukturschwachn Gebiete vo da Obapfoiz, ausm Boarischn Woid und am Donaumoos um Inglstod in d'Holledau kema. Wia dann in da Zeit vom Wirtschaftswachstum de Arbeida rar woan han, hams ab de 50'a Johr mechanische Zupfmaschinen eig'fiad. De erste Maschin is 1955 aus England importiert woan, späda hod dann de Firma Wolf in Geisnfäid Zupfmaschina baud. Seit 1967 werd da Hopfa komplett maschinell broggd.

Heidzudogs wead da Hopfa fast ausschließlich vo Familienbetriebe o'baud. Bloß in da Wachstumsphase zum Ausbutzn und dann beim Hopfazupfa wean no a boor Häifa, meißtns aus Osteuropa beschäftigt.