Judenburg

Aus Wikipedia

Judenburg is ane von 17 Bezirkshauptstädte in da Steiamork, nämli vom Bezirk Judenburg. Es liegt in da oft gnauntn Krisenregion westliche Obasteiamork, genaua im Aichföd, wos a relativ großes Toi is.

[dro werkln] Gschicht

Irgendwaun so ums Johr 1074 hot so ana a Urkundn ausgstöt, wo a Ort naumens "Judinburch" gnaunt wird. Jetzt kunnt ma manen, durt haum vui vü Judn gwohnt, wie gsogt: kunnt ma manen, wal eigentli hots do nur an so an Typn gebm, der irgendwie mit Judin ghaßn hot. Jedenfois die Stodt is gwochsn und hot 1224 die Stodtrechte erhoitn. So is Judnburg a bedeitendes übareggionales Haudelszentrum woan, und unta aundan hots a vü Haundel mit die Venezia geben, wos ma a am Stodtbüd va Judnburg recht guat segn kaun, wal da Stodtturm (mittlaweile mit an Planetarium ausgstottet) is typisch italienisch.

Da Stodtturm ist übrigens a es Wohrzeichn von Judenburg und is bereits im 15. Johrhundat als Glocknturm fia die danebrige Kirchn baut wurn. Irgendwaun hot man daun aba als Wochturm vawendat, wal vo obn oba siegt ma die gaunze Stodt und somit a a Feia, wenns irgendwo zum brennan aufaungan tat, wos im 19. Johrhundat öfta passiert. Blederweise hot daun eben so a Feia die gaunze Stodt und a den Turm niederbrennt, aba ma hotn daun recht schein wieder aufbaut, und seit 2006 hot a wie scho gsogt sogor a Planetarium.

Im Zweitn Wötkriag hots zwor a poor Diskussionen üba den Naumen vo der Stodt gebn, wal jo Judn doch net so beliebt worn zu der Zeit, aba irgendwaun haums daun beschlossn, dass a Kriag net die richtige Zeit is, üba sowos zum nochdenkn.

Nochn Kriag is da Stodt zerst amoi eh recht guat gaungen, aba seit dei Ochtzga gehts hoit a in Judnburg bergob, durch des, dass da Wirtschoft net gor guat gaungen is und vü Firman obzogn san, san a die Leit mitgaungen, und daher stirbt die Stodt - schein laungsaum, aba sicher - aus, net zletzt deswegn, wal jo bei Fohnsdorf a Einkaufszentrum baud worn is, wo die Gschäftl olle außizogn san.