Sømi
Aus Wikipedia
 |
De Artikln Sømi und Semme übaschneidn si thematisch. Hüif bitte mit, dass de Artikln bessa vonanaunda åbzgrenzt oda vareinigt wean. Bevoast den Hinweis wieda außaduast, möidt di bitte auf Wikipedia Diskussion:Redundanz, wo de Redundanzfälle diskutiat wean.
Dankschee! |
A Sømi (Plural Sømin, auf WMB a Sémmi, auf SB Seml) is a klõans runds Waisbrod ausn Woazmø, maistns mid fimf schdeanfeamig âignschidane Rün. S Woat Sømi kimd fum latainischn semilia, wås so fü wia Woazmø hoast, im Untaschiad zum dunklan Brod (Schwoazbrod, Hausbrod, Bauanbrod, etc.), wås in Ésdaraich und Siddaidschlãnd sunst géssn wiad. Auf Hochdaidsch sågt ma a "Brötchen" dazua.
Inhaltsverzeichnis |
[dro werkln] Wia ma s fria gmåcht håd
Aso wia d Béka fria mid da Hãnd d Sømin gmåcht håd, woa dés haifde fü Oawad und a lãngwiarige Gschicht und wiad déswéng haid neama fu fü Beka gmåcht. Aus dém Grund woan a d Sømin bis in d Mit fum 20. Joahundat a klõana Luxus, dén s oft neta am Wochnend gém håd. Fu dém kimd woaschainli a da Begrif "Kaisasømi", wai in da Zaid fu da Monachi an bsondane Faiadåg wia zum Baischbü in Kaisa sain Gebuatsdåg in ole Oatschåftn fum Lãnd soichane Kaisasømin an d Laid fadaild woan san.
Dechnische Maschinen, wia an elekdrischn Doagwoika, håds dåmåis nu ned gém. Ma håd ois mid da Hãnd mid am hüzan Doagwoaka måcha miassn. Déswéng is da Doag a maisdns recht woach gmåcht woan, damid s laichda ged.
Schdåd an Doag mid Geam, håd ma maisdns an Sauadoag zong, dea lokara und laichda zum woikn is. Aus dém Grund mõanan fü, das a richdiga Sømidoag iwa 20 Schdund råstn muas. Fria håd ma åwa so an Doag jéde Schdund mid Mø und Wåssa auffrischn miassn, damid d Dribkultuan ned an eanane aiganen Schdofwegslbrodukt fadeam. Ma håd a neta an klõan Dail fum Mø so ãgsézt, wai sunst baim lãngen Råstn fum Sauadoag dés gãnze Mø zasézt wiad und neama zum båcha is.
Es is a zu deara Zaid a ãndas Droad ãbaud woan und s Woazmø fu fria is ned mid de hochweating Mø fu haid, mid dénan si de Beka fü laichda dan, faglaichboa.
Dé gãnzn Fakdoan, bsondas d hoate Oawad fum woika, hãm dazua gfiad das da Doag lãng råstn miassn håd. D õazøn Møpartikl han bai deara Oawadswais eng bainãnda bikt, so dass fum Wåssa neta a weng faicht woan san. Dés is åwa kõa Aufgê sondan blos a Schbaichan fu Faichdigkaid, de bain Båcha fia s Faklaisdan nodwendi is.
Es is haid schwa zum sång, wia d Sømi fu fria wiakli woan. Woaschainli woan s åwa duach dés lãnge Råstn und duachn Sauadoag recht aromatisch, foa oim a wai ma néd mid da haiding Higien goawat håd und auf dé Oat "wüde Geamschboan" (aus da Luft) zu da Aromabüdung baidrång hãm.
In Öko-Békarain wiad haid a weng a ågwãndlts Fafoan heagnuma. Ma nimd maistns a Foikoanmø und wéng Båkdribmitl und låst in Doag lãng råstn. A d klõan Hãndweaksbéka gengan wida mea zruk auf de oide Oawadswais, wo ma wéng Geam heanimd und in Doag lenga gê låst.
[dro werkln] Wia s haid maschinel gmåcht wiad
Haid wean d Sømin fu de Béka und fu de indusdrieln Grosbékarain maschinel heagschdöd. D håib- oda foiautomatische Brodukzion ealaichdat d Oawat und daduach san a d Sømin fü biliga woan. Dés muas åwa néd hoassn, das soichane Sømin automatisch fu ana schlechdan Qualidet san.
Haid wiad da Sømidoag maistns one Foadoag diarekt gmåcht. Ma nimt a Woazmø fum Tip 550, Wåssa, Såiz, Geam und filaicht a nu møhåitigs Båkmitl. Oft wiad a nu a weng a Fet dazua gém. S Båkmitl fasoagt in Geam mid Neaschdof und fabéssad d Schdabilidet fum Doag, wai bain Råstn weniga Mø zasézt wiad. Es wiad hauptsechli Woachwoaz-Mø fawent, dés guad zun Brodbåcha basst. Da Geam wiad foahea mid Wåssa ãgsézt.
Modeane Woikmaschinan fakiazn a de Zaid de da Doag råstn muas, wai s mea Gråft hãm wia a Ménsch und da Doag zun Woika néd so woach sâi muas. Bain Woika wean d õazön Møpartikl fuanãnda drend und s Wåssa kã si âilågan. Daduach wiad d Qualidet fu da Faklaisdarung bain Båcha bschdimd. In am Mixa wiad da Doag ziaka 60 Sekundn, in am Schbiralwoika ungefea 7 Minutn gwoikt. Ödane Maschinan kinan åwa a 20 bis 30 Minutn braucha. Dabai wiad da Doag natiali woam und d optimale Demparatua is bai 26° Celsius. D Doagausbaitung entschbricht aso ungefea TA 158-163. Wãn d Sømi mid da Hãnd gfoamd wean soin, wiad da Doag maistns a weng weacha gmåcht.
Bain Doag måch muass zwischn jédn Oawadsschriad oiwai a weng gråst wean, damid si da Doag entschbãna kã. D gfoamdn Sømin keman dãn auf Blech und wean in am faicht-woaman Kamal zum Goan glågad. Danåch san s feati zun Båcha. Optimal is wãn de Doaglin 2/3 foigraift san. Da Ofn wiad bain Bocha mid Wåssadãmpf befaicht und d optimal Båkzaid is 18 Minutn. Kuaz befoa d Sømi feati båcha san, wiad bain Ofn da Zug auf gmåcht. Daduach ziagt de faichde Luft aussi und d Grustn kãn si büdn.
[dro werkln] Sømin und Brötchen
Sømin und Brötchen san néd genau dés søwa, a wãns aus fåst dén søbn Doag gmåcht wean. De dipisch Sømi-Foam mid de 5 schbiaralföaming Rün gibt s aigentli neta in Ésdaraich und Baian.
De noaddaidsch "Brötchen" san a maisdns ned rund sondan lenglich, genau so wia d "Panini" in Italien oda d "Bread-Rolls" in Englãnd und Amearika.
[dro werkln] Schau a unta
- Monflessal
- Wekal
- Koanschbiz
