Pristaticci
From Wikipedia
I Pristaticci sò i primi ghjorna di u mesi d'aprili, fora di u prima aprili. In generali, i pristaticci sò u dui è u trè aprili. Accadi à spessu chì u tempu fussi gattivu issi ghjorna quì è par dà una spiigazioni à issu gattivu tempu, ci hè a fola di i pristaticci. Issa fola hè una dialogu trà u mesi di marzu è un picuraghju, chì si littigani. U tempu era impurtantissimu, à l'ebica, par quiddi chì t'aviani a ropa. Sienti à fola di i pristaticci, i pristaticci sò dui ghjorna chì sò stati pristati da aprili à marzu. Ma u prima aprili ùn faci micca partita di i pristaticci. Quissa hè bedda chjara in a variazioni di a fola urighjinaria da Laretu:
- - Marzu, catarzu, figliolu di manghjonu. Ti ni sè andatu senza lacà mi un agnonu.
- - Aprili, lu mè frateddu, presta mi lu prima è lu dui.
- - Lu prima u tengu da mè. Ti pristaraghju u dui è u trè.
Ed hè par quissa chi u tempu hè gattivu. Si sà bè chì marzu, t'hà setti barretti. Ci hè parechji variazioni, da un paesi à l'altru, in u dialogu trà marzu è u picuraghju. Par asempiu, in Frassetu, si dici:
- - Marzu, Catarzu, figliolu di manghjonu M'ha pigliatu tutti i me agneddi è i mè agnona.
- - O Aprì, lu me frateddu, presta mi ni dui chì aghju da fà penta u falsu picuraghju.
È in Zevacu:
- - Marzu, Catarzu, figliolu di manghjonu M'ha presu tutti i me agneddi è un m'ha lacatu cà un agnonu.
- - O Aprì, u me frateddu, dà mi ni dui chì un l'aghju da par mè.
[edit] Da veda dinò
| E legende di Corsica |
| I Pristaticci - A Spusata - U Scuntumatu - U Frate è a Sora - A torra di Capiteddu - U limitu trà Frassetu è Bastelica |
