Albert Gröning
From Wikipedia
Albert Gröning (* 26.Januar 1839 in Bremen; † 23.Juni 1903 in Bremen) weer Börgermeester vun sien Vaderstadt Bremen.
De Vadder vun Albert Gröning weer Syndicus bi 'n Senat vun Bremen, de Grootvadder Georg Gröning weer ok al Börgermeester. Albert studeer Jura un is in dat Jahr 1860 Afkaat wurrn. He hett bi 'n Nationalvereen mitmaakt un sik för den Krieg gegen Frankriek in dat Jahr 1870 freewillig meldt. 1867 is he in dat Parlament vun Bremen, de Börgerschup kamen un 1871 weer he denn Senator. Bit 1890 weer dat Landherrnamt sien Saak, dornah weer he tostännig för Finanz- un Stüersaaken. He harr jümmers wedder mit dat Probleem vun de Stadt ehr Schullen to kriegen. De sünd vun Jahr to Jahr grötter wurrn. Mit al sien Kraft hett he gegen de Tollpolitik vun dat Düütsche Riek gegenan streden. Börgermeester is he tweemal ween: Vun 1894 bit 1897 un denn noch mal vun 1900 bit to sienen Dood 1903.
