Döringer Sintfloot
From Wikipedia
De Döringer Sintfloot weer en Överswemmen in't Johr 1613, bi de grote Rebeden in Döringen ünner Water stunnen. Alltohoop sünd woll so 2261 Minschen doodbleven.
An'n 29. Mai 1613 harr dat temlich dulle Unweder in Döringen geven, so dat de Pegels vun vele Strööm binnen en poor Stünnen üm en poor Meter anstegen sünd. Dat Rebeet vun Mühlhausen, Langensalza un Artern in'n Norden bet na Stadtilm un Ichtershausen in'n Süden, vun Erfurt un Gotha in'n Westen bet na Naumborg in'n Oosten weer bedrapen. As „Thüringer Sintfloot“ is dat Unweder in de Chröönken vun vele Öörd beschreven:
In Kahla geev dat en poor Doden, grote Delen vun Jena stunnen ünner Water.
In Zottelstedt bi Apolda is dat Water vun de Ilm üm 6 bet 8 m anstegen un hett grote Delen vun't Dörp, de an de Ilm legen, toschannen richt. In Weimar hett de Floot 44 Hüüs tweemaakt, in Bad Berka 23 Hüüs, in Erfurt 125 Hüüs.
Ok in Mattstedt is de Ilm üm 6 Meter anstegen un överswemm dat hele Dörp an'n Stroom, so dat de Minschen ehr Hüüs later jümmer mehr den Hang hooch boen un nich mehr an'e Ilm.
In Bad Sulza is de en poor Johren fröher an de Ilm opboote Saline ünnergahn. De Minschen hebbt se aver wedder an de sülve Steed opboot.
