Fischeree
From Wikipedia
Fischeree hett dat an de Nordseeküst al ümmer geven, aver eerst sietdem dat de Iesenbohn gifft, is dat mööglich, Seefisch in korte Tiet ok in't Binnenland to verfrachten. 1879 woorn de eersten Fischereegesetzen vekünnt, in de wat över de Maschenwied von de Netten, de Maten von de fungen Fisch un de Schoontieden in stund.
De Küstenfischeree warrt langs de gesamte Küst in dat Wattenmeer von de Sielöörder ut bedreven. Fischt warrt tomehrst Butt, Scholl un Granaat. De Kutters, mit de de Fischers henutföhrt, sünd bit to 10 m lang, un to de Kru höört twee oder dree Mann.
De Hochseefischeree warrt as Herings- oder Frischfischfang up hoge See bedreven. Fanggrünn för Hering sünd de Doggerbank, de Fladengrund bi de Shetlandinseln un de ingelsche Küst. De Hööftfangtiet is von Mai bit Dezember. Ene Fangreis kann veer bit sess Weken duren. De Drievnetten weert ut vele 30 m lange enkelte Netten tosamenknütt' un sünd denn 3 bi 4 km lang. Se weert baben von lüttje Bojen un Korkstücken un unnen von Bleestücken lootrecht in't Water hooln. Fischt warrt nachts. Bi Daag weert de Heringen kählt un mit Solt in Kantjes verpackt.
Heimathavens von de Frischfischdampers sünd Bremerhaven, Cuxhaven un Hamborg. Mit Grundsleppnetten weert tomehrst Kabeljau, Schellfisch un Seelass fungen. De Fanggrünn liggt bi Iesland, de Barentssee un de Lofoten. De Hoochseekutter fangt vör allen Schollen un Seetungen in de Nordsee.
