Fro vun Arlington Springs
From Wikipedia
De Fro vun Arlington Springs (engelsch Arlington Springs Woman) is en Skelett, dat op dat Santa-Rosa-Eiland, dat to de Kanal-Eilannen in Kalifornien höört, funnen worrn is.
In de Johren 1959/1960 hett Phil C. Orr, de Kurator för Antropologie un Naturhistorie an dat Santa-Barbara-Museum för Naturhistorie, bi Arlington Springs op Santa-Rosa-Eiland twee Böverschenkelknaken utgraven. Orr glööv, dat he de Överresten vun en 10.000 Johren olen Mann funnen harr, un nööm den Fund den „Mann vun Arlington Springs“ (Arlington Springs Man).
Orrs Nafolger as Kurator, John R. Johnson, ünnersöök de Knaken later wedder. He hett denn rutfunnen, dat de Mann egentlich ene „Fro vun Arlington Springs“ wesen is. Dör Radiokarbondateren hebbt se denn faststellt, dat de Fund 13.000 Johren oolt is, un dormit dat öllste Skelett in Noordamerika.
De Fro vun Arlington Springs leev an’t Enn vun’t Pleistozän op en Eiland, vun dat hüüt blot noch Santa-Rosa-Eiland un en poor annere lütte Eilannen över sünd un dat vun de Forschers Santa Rosae nöömt warrt. Dat Eiland weer to de Tiet üm un bi acht Kilometers vun de Küst weg, wat bedüüd, dat de Minschen to de Tiet mööglicherwies al Bööd harrn.
