Wallia
From Wikipedia
Wallia († 418) weer König vun de Westgoten vun 415 bit 418. He is König wurrn, as Athaulf in dat Jahr 415 an de Siet bröcht wurrn is. Wallia süms hett Athaulf sien Upfolger Sigerich ümbringen laten, as de man eerst söven Dage an’t Regeren weer.
Wallia hett Freden maakt mit den weströömschen Kaiser Honorius un hett enen Verdrag mit em slaten. He stüür Honorius siene Süster Galla Placidia torüch. Dorför kreeg he 417 Aquitanien as dat Land tospraken, wo de Westgoten as Bundsgenoten (Foederati) vun de Weströmers leben schollen. Wallia hett denn Tolosa (hüdigendags Toulouse) as Setel vun sien Regeren innahmen. För den Rest vun dat 5. Jahrhunnert bleev Tolosa de Westgoten ehr Hööfdstadt.
418 is he vunwegen sien Allianz mit de Römers in de iberisch Halfinsel inbraken un hett en Krieg mit de Wandalen anfungen. De silingisch Wandalen hett he ünnerkregen un de Alanen hett he so slaan, dat de povere Rest bi Gunderich ünnerkrüpen möss. Dat weer de König vun den asdingischen Twieg vun de Wandalen.
Wallia weer bannig goot beropen as Kriegsmann, man he goll ok as en vörsichtigen Staatsmann.
Dat gifft histoorsch Borns, de düüt an, dat he man bloß vunwegen en Hochtiet mit Alarich I. verwandt weer. Upfolgt is em de unehlichen Söhn vun Alarich, Theoderich I.
Kiek ok nah bi de List vun de Westgoten ehr Königen.
