Cricket
From Wikipedia
|
Ch't' articl'ye fut c'menchie en Jèrriais
 |
Lé cricket est eune gamme d'êtchipe qu'nou joue atout eune pétite duthe balle et eune batte.
Les batteurs (y'en a deux à la fais) d'eune êtchipe gângnent des mèrques en couothant entre les deux vitchets. Châque fais qu'un batteux tape la balle tchi lî est pitchie par l'pitcheux d'l'aut' êtchipe, i' peut couôrre et êchangi d'pliaiche auve l'aut' batteux. L'aut' êtchipe tâche dé gaffer la balle et abattre lé vitchet d'vant qu'il y r'veinge. Si san vitchet est abattu par l'pitcheux ou par iun d'l'aut' êtchipe quand i' couort, l'batteux est env'yé hors et est rempliaichi par l'préchain dé s'n êtchipe.
Les batteurs gângnent quat' mèrques s'i' tapent la balle jusqu'au bord du tèrrain et six s'i' tapent la balle hors du tèrrain sans d'valer à tèrre. Mais si iun d'l'aut' êtchipe gaffe la balle dans l'air, l'batteux est env'yé hors.
Des gammes dé cricket peuvent duther des journées, mais y'a des variâtions.
[amendaer] Histouaithe
La gamme dé cricket éthait 'té jouée dans les clios par des gardeurs dé brébis au 13e siècl'ye en Angliétèrre. Ch'tait probabliément la badgette du gardeux tchi d'vînt la batte. Lé mot cricket est r'cordé pouor la preunmié fais dans un acte dé justice en 1598.
Lé sport fut pâssé ès colonnies, et achteu nou joue l'cricket en Angliétèrre, en Australie, en Nouvelle Zélande, en Înde, au Pakistan, en Bangladesh, ès Îndes du Vouêt, en Afrique du Sud, en Zimbabwé et au Sri Lanka (les pays tch'ont les pus fortes êtchipes) épis dans un tas d'aut's pays étout. La France est un parchonnyi d'l'ICC (International Cricket Council) et Jèrri et Dgèrnésy y sont attatchis.
