Di Wikipedia, l'enciclopedìa lìbbira.
Bonvinutu ntâ pàggina di Anakletos ntâ Wikipedia Siciliana, l'Enciclopedìa lìbbira. Pi mannàrimi cummenti supra qual'è gghiè tema, addopira la mô pàggina di discussioni. Grazzi assai!
[cancia] Mi fazzu canusciri di viàutri
Ntô World Wide Web sugnu accanusciutu comu Anakletos ma lu mo veru nomu è Peppi, Peppi Coniglioni ('n taliànu "Giuseppe Coniglione"). Sugnu nu studenti dû Liceu Classicu "B.Secusio" di Vizzini, na nica cità dâ pruvincia di Catania, e unu di li mò tanti passatempi è lu studiu appassiunatu e varigàtu.
Pi mia li cosi cchiù mpurtanti ntâ vita sunu: Eleonora, la mò zita (na brava carusidda ca studìa raggiunirìa), ca veni prima di ogni àutra cosa, appoi, lu rispettu, l'unistà, la paci, lu curagghiu, la libbirtà, lu pinsari, l'èssiri umili e la mò terra, la Sicilia.
La cosa ca m'appassiona cchiù assai è lu scrivìri, trasmettiri li mò prufunni sintimenti nnôn pezzu di carta, libbiràri li mò strèusi pinzeri e fari nesciri la mò contrupigghiata ispirazzioni comu pi sfidari mia stissu, prifiribbirmenti scrivu cunti e puisìi, sia 'n sicilianu ca 'n talianu. Haju 'n prugramma lu cumpletamentu e la pubblicaziuni di nu rumanzu brivi in lingua siciliana, ca ci travagghiu di anni.
Ascutu qualisiasi gèniri di musica, pridiliggènnu supra tutti chidda dance e house, senza tuttavia sdignari tutti l'àutri gèniri, haju na passioni pê gruppi e pê cantanti ca cantunu 'n Sicilianu, spiciarmenti Rosa Balistreri, Tinturìa, Roy & Paci Aretuska, Francu Battiatu ecetra... Haju na particulari prifirenza macari pô cantanti napulitanu Gigi Finizio, ca cocche vòta mi fapi rilassari e pinzari cchê sò canzuni dê "ciàuri" sintimintali.
Nu tempu avìa fattu cu 'n mò cumpagnu na picciula radiu ca facèumu trasmettiri pi via broadcast nti internet, Radiu Cuttigghiu Live, unni iu mi pigghiava l'arènza di fari nu tilijurnali satiricu, RCL Flash News, ca facìa pisciari dê risati tutti chiddi ca s'attintàunu. La cosa durau na para di simani picchì, nun avènnu a disposizzioni nu server fissu (ca costunu 'n saccu di soddi!), avèumu hà canciari lu IP pì trasmettiri ogni vòta ca attaccaumu, nfurmannu tutti li utenti ca avèumu (8-12 massimu) pi via chat. Stu fattu tagghiau li jammi ê vulintirusi ntinzioni ca avèumu e prestu arruvammu a capiri ca la cosa accussì nun putìa funziunari, macari pô fattu ca la liggi taliana pi sti cosi è assai riggida e nun duna uppurnità di palòra senza ca unu havi boni soddi di putìri spènniri.
[cancia] Motucichetta
N'àutra cosa ca mi piaci, ca mi fapi sfantasiari lu pinzeru, è lu jiri peri peri ccâ mò motucichetta, pircurriri strati di campagni ammenzu â natura e taliari panurami sempri novi e arruvari ntî novi paisi.
Mò patri fapi lu marmararu e lu scurtùri, havi nu beddu cantieri sutta a casa unni stammu. È nu cristianu ca ntâ vita nun penza ad àutru ca ô travagghiu e â famigghia, è scarsu pô nesciri, pô divirtimentu e pô discurriri. Vinni jittatu a travagghiari di quannu avìa novi annuzzi picchì sò patri mossi quannu iddu avìa cincu anni, all'etati di 38 anni pi na tinta frevi, e iddu nun ni vulìa sapìri di scòla. Mò nannu paternu era nu viddanu travagghiaturi comu a mô patri, era analfabbeta e cridìa ntî l'idiali dû cumunismu cu cui avìa trasutu 'n cuntattu cummattènnu ntâ Secunna Guerra Munniali. Mò nanna paterna, macari idda puviredda, era figghia di nu picuraru.
Mò matri, ca havi lu pinzeru dâ casa e dê subbizza, è di Francufonti e havi urìggini cummisani pi parti di patri. Idda criscìu 'n Sicilia nzinu a sett'anni cchê sò nanni e appoi vinni purtata dê sò ginituri â Svizzira, cantoni di Zurigu, unni avèunu jutu a imigrari. Ccà idda ricivitti la tipica aducazzioni dâ zona e si nzignau a parrari lu tidèscu comu na matri lingua, studiannu ntê scoli e jennu a spicilizzarisi comu upiraia tèssili, truvannu nu travagghiu a sidici anni ca ci dava nu stipendiu di 1300 franchi ô misi, sempri parrannu di anni 1970ini. Sò patri pirò vosi turnari a Francufonti picchì avìa nustalggia dâ sò terra e nun vulìa ca sò figghia si facìa nu avvinìri â Svizzira picchì sono' ci ristava pi sempri. Idda canuscìu a mô patri pi vulìri di mò nannu ca si proccupava pirsurnamenti di scègghiri carusi di prisintari â figghia pi falla maritari. Mò nannu maternu avìa na pirrèra, anzemi a certi soci, ma lu sò giuvanili stili di vita spinziratu, viaggiannu 'n Nghirterra, Girmania, Francia, Svezzia, Belgiu e nzinu â Turchìa, ci fici scumpariri stu beni e lu custrincìu a imigrari â Svizzira. Mò nanna avìa macari idda lu patri mortu e vinni custrinciuta dû novu maritu di sò matri a fujirisinni a suli 14 anni cu sò frati, appuntu mò nannu, e a ristari prèna di nu primu picciriddu ca ci mòri a picca misuzzi.
Ju sugnu lu tirzugènitu e ùrtimu figghiu, portu lu nomu sia di mò nannu paternu e sia di mò nannu maternu: tutti dui s'hana chiamatu "Peppi".
[cancia] Qualisiasi dumanna
Pi la qualisiasi dumanna nun aspittati a farivi sentiri, sugnu a vostra cumpleta dispusizioni quannu haju lu tempu pi darivi arènza Discussioni.
[cancia] Liami Esterni
