Ciriveddu

Di Wikipedia, l'enciclopedìa lìbbira.

Disegnu dû Ciriveddu umanu

Lu ciriveddu (o "cirveddu") è la parti dû corpu animali dèdita a l'elabburazzioni dî nfurmazzioni c'agghìcanu attraversu l'òrgani di senzu (Occhi, Aricchi, ecc.) pi trasfurmàrili ntê muvimenti ca sunnu lu menzu di ntirazzioni cu l'ammenti sternu.

Lu sò nternu è furmatu principarmenti di na sustanza janca, abbolta sternamenti d'un stratu di sustanza gricia, la curtizza ciribbrali. Lu cirveddu è principarmenti furmatu di dui tipi di cèlluli: cèlluli ghiali e cèlluli nirvusi o niuroni. La funzioni dî cèlluli ghiali è principarmenti chidda di sustèniri, nutricari e prutèggiri li niuroni. Li niuroni trasmèttinu li nfurmazzioni sutta forma di mpusi alèttrici. Iddi cumùnicanu tra d'iddi scanciannu spicìfichi sustanzi chìmichi chiamati niurutrasmittitura attraversu spiciali ntirfacci chiamati sinapsi. Li nichi mmirtibbrati comu li nzetti ponnu aviri miliuna di niuroni ntô ciriveddu, mentri lu ciriveddu dî cchiù granni virtibbrati pò cuntinìrinni oltri cintinara di miliardi. Lu ciriveddu umanu havi na struttura murfulòggica particulamenti cumplessa e havi na diminzioni nutèvuli. Pisa circa 1,5 kg e è custituutu di tanti miliardi di niuroni. È na massa ovuidali cummessa, divisa 'n dui emisfèri e prisenta na supirfici rugusa carattirizzata di nummarusìssimi solchi, chiamati circummuluzzioni.

Lu ciriveddu, nzèmmula ô truncu ciribbrali e ô cirividdettu, forma l'encèfalu ca cû miduddu spinali custituisci lu sistema nirvusu cintrali. L'encèfalu è alluggiatu ntâ buatta crànica c'havi na funzioni prutittiva. N'ultiriuri prutizzioni è custituuta di tri mimbrani suttilìssimi ma risistenti, ditti mininci.

Lu ciriveddu cuntrolla e cuòrdina la majuri parti dî muvimenti, dû cumpurtamentu e dî funzioni omeostàtichi dû corpu, comu lu bàttitu cardìacu, la prissioni sanguigna, la riulazzioni dî flùidi e la timpiratura dû corpu. Li funzioni cchiù avanzati dû ciriveddu pirmèttinu la cuscenza, l' emuzzioni, la mimoria, l'apprinnimentu e la chianificazzioni dû muvimentu.

[cancia] Ciriveddu ntâ natura

Nunustanti tanti classi d'armali pussèdinu un sistema nirvusu, sulamenti tri gruppi d'armali, cu arcuni ccizzioni, hannu ciriveddi dicisamenti cumplessi: l' artròpudi (p'asempiu nzetti e crustàcii), li cifalòpudi (purpi, sicci e anàluchi mulluschi) e li virtibbrati. Lu ciriveddu di l'artròpudi e dî cifalòpudi è custituutu di dui grossi fasci paralleli di nervi ca si stènninu longu lu corpu di l'armalu. Lu ciriveddu di l'artròpudi cunzisti d'un granni lobbu òtticu situatu arreri ognadunu occhiu ca suvraintenni la funzioni visiva e un ciriveddu cintrali cu tri divisioni. Lu ciriveddu dî cifalòpudi pussedi un gruppu cintrali di lobbi, affiancati di dui granni lobbi òttici (Butler, 2000).