Glubbalizzazzioni
Di Wikipedia, l'enciclopedìa lìbbira.
Cû tèrmini glubbalizzazzioni si ìnnica lu finominu di crisciuta prugrissiva dî rilazzioni e dî scanci di diversu tipu a liveddu munniali 'n diversi ammiti assirvatu a partiri dâ fini dû XX sèculu.
'N campu ecunòmicu "glubbalizzazzioni" dinota la forti ntigrazzioni ntô cummerciu munniali e la criscenti ntirdipinnenza di li paisi l'uni di l'àutri. Câ stissa palora si ntenni macàri l'affirmazzioni dî multinazzuznali ntô scènariu di l'ecunumia munniali. 'N stu sitturi si fa rifirimentu di vota 'n vota sia â pruduzzioni spissu dislucata ntê paisi di lu sud di lu munnu; sia â vinnuta, ca vidi li prudotti d'arcuni marchi tantu spunsurizzati 'n cummerciu 'n quasi tutti li paisi dû munnu.
E' propiu nta l'accizzioni ecunòmica ca la glubbalizzazzioni è cuntistata d'arcuni muvimenti no-global e new-global. (vidi videmma Pòpulu di Seattle, No logo)
Cu "glubbalizzazzioni", a liveddu midiaticu, ci si rifirisci â diffusioni di menzi di cumunicazzioni glubbali, comu Internet. Ntô stissu campu lu tèrmini ndica macàri la prugrissiva diffusioni di nutizzìi supra suggetti ntirnazziunali ntê nutizziari lucali.
Nfini lu tèrmini "glubbalizzazzioni" è utilizzatu videmma 'n ammitu culturali e ndica giniricamenti lu fattu ca nta l'èbbica cuntimpurania ci s'attrova spissu a rappurtàrisi cu l'àutri culturi, sia a liveddu ndividuali a causa di migrazzioni stàbbili, sia nazziunali ntê rapporti tra li stati. Spissu ci si rifirisci macàri a l'elivata e criscenti mubbilitati dî pirsuni cu na pirmanenza limitata timpurarmente (turisti, òmini d'affari, ecc..).
Nta lu mmagginariu cullèttivu la "glubbalizzazzioni" è spissu pirciputa comu un finòminu prugrissivu, ca si jiu sviluppannu liniarmenti ntô tempu 'n modu naturali, e ca vidi la cunnizzioni attuali ntê sudditti ammiti comu na fasi ntirmedia tra lu giniricu passatu e lu futuru.
Ntâ cuscenza dî pòpuli lu finòminu si sta cunsulidannnu nzèmmula â diffusioni dû puntu di vista glubbali e ô mpegnu cuncretu pûn munnu megghiu ô di ddà dî propi ntiressi pirsunali e dî cunfini nazziunali. Si parra sempri cchiù spissu di "glubbalizzazzioni dî dritti" e pirciò di rispettu di l'ammienti, d'eliminazzioni dâ puvirtati, d'abbulizzioni dâ pena di morti e emancipazzioni fimminili 'n tutti li paisi dû munnu.
Di pari passu â diffusioni di nutizzìi supra scala munniali e â prugrissiva prisa di cuscenza dî prubblimatichi glubbali, accuminzanu a svulcirisi granni manifistazzioni câ participazzioni cuntimpurania 'n nummàrusi lucalitati di dicini di miliuna di pirsuna.
