L'ùrtima distruzzioni di Catania

Di Wikipedia, l'enciclopedìa lìbbira.

Versu li tri e tri quarti di notti, di lu novi di jinnaru di l’annu 1693, la terra trimò cu na viulenza tali ca tanti fàbbrichi e tanti casi furu danniggiati e ntra li pirsuni si cuntaru novi morti.

Tutta la nuttata la genti stetti ntê cresi a prijari e quannu agghiurnò si vitti ca li mura di quasi tutti li casi èranu aperti e tantìssimi pronti a sdirubbari.

Chissu successi di vinniridìa; sabbutudìa nun succiudìa nenti; dominicadìa, quattr’uri doppu menzujornu, n'àutra scossa fici sdirrubari lu campanili di la cattitrali; nenti cchiù pi tuttu lu jornu, ma a l’ottu e tri quarti, doppu ca si sintìu un terrìbbili scrusciu suttirràniu, comu un ventu spavintusu, nzèmula a scoppi cuntìnui e trimenti, la terra tutta si scossi accussi forti ca abbiò 'n terra ogni cristianu ca era nta ddu mumentu additta.

Stu tirrimotu, sdirubbò quasi 60 citati nta la Sicilia urientali e ammazzò, chê mura e li casi e tuttu chiddu ca cascò, la maggiur parti di l’abbitanti.

La citati di Catania si sdirubbò cumpretamenti e vurricò sidicimila dè sò abbitanti.

Sùbbitu doppu sta trimenda scossa, di la vucca di lu Mungibeddu si vìttiru tanti lingui di focu ca calàvanu pi lu cuntornu.

Nzèmula, macari lu mari fici sèntiri la sò vuci: lu sò funnali appi un sullivamnetu accussì forti, ca l’acqua sghiddò nta l’aria e pi tutti li lati.

Li catanisi ristati vivi, s’attruvaru mmenza na granni timpesta di acqua, fangu e petri.

Nzoccu era ristatu additta doppu lu tirrimotu, fu trascinatu avanti e arreri di dda gran massa d’acqua, e accussì tanti cristiani morti e vivi.

Ancora na vota, Catania, vinìa distrutta.