Ricustruzzioni
Di Wikipedia, l'enciclopedìa lìbbira.
Doppu lu tirrimotu dô 1693, Catania era tutarmenti distrutta: “Qui fu Catania” scrìssiru li crunisti di l’èbbica.
Ma lu 1693 fu l’annu di nàscita di la cità d'oggi, ricustruita supra li sò ruvini.
Fu ricustruita secunnu li dittami di Giuseppi Lanza, Duca di Camastra, ca fu mannatu di lu Vicirè Uzeda e c’happi d’iddu la nnumina a vicariu ginirali pi la “Val Demone” e doppu macari pi la “Val di Notu”, cu putiri chini, p’affruntari la drammàtica situazzioni ca s’avìa criatu.
Appena juntu a Catania, lu Duca di Camastra, sùbbitu dumannò tècnici e militari, pi sgumbrari li maceri, cummàttiri latri e dilinguenti e nutricari la pupulazzioni aridduciuta a la fami.
Fattu chissu, ntô giugnettu dô 1694, nzèmula a li rapprisintanti di tutti l’òrdini di la citati, priparò “u pianu ginirali” : Lanza ordinò, pi Catania, ca li strati di ricustruiri avìanu èssiri tutti ‘n lìnia ritta, larghi e spazziusi, ncruciati d"àutri strati chê stissi carattirìstichi: la via Etnea, la via Garibardi, Via Vittoriu Manueli e Via San Giulianu sunnu la tistimunianza ca accussì fu fattu.
Cunzidirannu li resti di l’antichi difici, si vidi ca la cità si trova a occupari oggi l’anticu situ, e sta dicisioni fu pigghiata pi nun abbannunari li furtificazzioni ca avìanu ristati additta.
“Li citatini facìanu la gara pi ricustruiri casi e palazzi pi tuttu lu tracciatu ca l’auturità avìanu signatu” (fonti pigghiata di nu scrittu di lu stòricu binidittinu Vito Amico).
Pi dicenni Catania è tuttu ‘n canteri, ca attrai populazioni e travagghiatura, ca rimetti n motu l’ecunumìa, ca pirmetti a tanti architetti di l’èbbica di spirimintari novi tècnichi e novi stili (l’architetti catanisi Alonzo di Benedetto e Francesco Battaglia, Girolamo Palazzotto di Messina, lu palermitanu Giovan Battista Vaccarini, e appoi lu tuscanu Stefano Ittar e tanti àutri). Ntra tutti chissi Vaccarini è chiddu ca lassau l’òpiri chiù beddi.
Lu baroccu di Vaccarini è la rialabburazzioni di li formi e di lu ritmu clàssichi, nzèmula a l'usu di li materiali e di li stilemi di lu ripirtoriu tradizziunali catanisi. F. Fichera, architettu di l’anni trenta, accuszì scrivi di Vaccarini: " Iddu avìa lu sigretu di lu ritmu, un donu ca Diu offri a li granni architetti e a li granni musicisti”,
Vaccarini ristaurò lu pruspettu di la Cattedrali; custruìu nta chiazza o domu la “funtana dô liafanti” (divintatu lu sìmmulu di Catania) e lu palazzu Sinatoriu; e appoi tanti òpiri una cchiu bedda di l’àutra (li Palazzi Valle e Serravalle, la Chiesa di San Giuliano, ntâ chiazza degli Studi participò a li travagghi di l'Università e dô Palazzo Di Sangiuliano; rializzò ancora lu Collegio Cutelli, Casa Vaccarini, la biblioteca dô Munasteru dî binidittini e la Badìa di li mònichi di San Benedetto).
Cu veni oggi a Catania, vidi na cità nova: li tistimunianzi di lu passatu funnu sdirubbati e vurricati. Pi setti voti sta citati fu spasciata e scancillata e pi setti voti, cu tinacia, fu rifabbricata.
Melior de cinere surgo - Megghiu di prima rinàsciu di li me cìnniri !
