خواجہ ابراھیم بن ادھم

وکیپیڈیا سے

حضرت خواجہ ابراہیم بن ادھم بادشاہ بلخ رحمۃ اللہ علیہ
( متوفی :162ھ /778ء)
پورا نام: ابراہیم بن ادھم بن سلیمان بن منصور بن یزید بن جابر
کنیت: ابو اسحق
آپ رحمۃ اللہ علیہ کے حالات بہت کم دستیاب ہیں آپ رحمۃ اللہ علیہ بلخ کے بادشاہ تھے کسی واقعہ سے متاثر ہو کر تارک الدنیا ہو گئے اور صحرا نوردی کرتے ہوئے نیشا پور کے نواح میں پہنچ گئے وہاں ایک غار میں نو سال تک مصروف ریاضت رہے پھر مکہ معظمہ چلے گئے اور کچھ عرصہ تک وہیں عبادت و ریاضت میں مشغول رہے۔آپ رحمۃ اللہ علیہ کو بہت سے بزرگان دین سے شرف نیاز حاصل رہا حضرت جنید بغدادی رحمۃ اللہ علیہ کے بقول آپ رحمۃ اللہ علیہ فقراء کے تمام علوم و اسرار کی کنجی ہیں۔آپ رحمۃ اللہ علیہ کا مشہور قول ہے کہ جب گناہ کا ارادہ کرو تو خدا کی بادشاہت سے باہر نکل جائو۔ آپ رحمۃ اللہ علیہ کے سال وفات کے بارے میںاختلاف ہے بہرحال مختلف روایات کی روشنی میں آپ رحمۃ اللہ علیہ کی وفات (160ھ / 776ء اور 166ھ/783ء) کے عرصہ کے دوران قرار پاتی ہے ۔ آپ رحمۃ اللہ علیہ کے مزار کے متعلق بھی اختلاف ہے کچھ لوگوں کا خیال ہے کہ آپ رحمۃ اللہ علیہ شام میں مدفون ہیں۔ بعض روایات کے مطابق آپ رحمۃ اللہ علیہ کو بلاد روم کے ایک بحری جزیرہ میں سپرد خاک کیا گیا ۔ ایک روایت کے مطابق آپ رحمۃ اللہ علیہ کا مزار بغداد ( عراق) میں ہے ایک خیال یہ بھی ہے کہ آپ رحمۃ اللہ علیہ بلاد روم کے ایک قلعہ’’ سوقین‘‘ میں مدفون ہیں۔ شہزادہ دارا شکوہ قادری رحمۃ اللہ علیہ نے آپ کا شام میں مدفون ہونا زیادہ درست تسلیم کیا ہے۔

[ترمیم] حوالہ جات

(اردو دائرۃ المعارف اسلامیہ ) ( سفینۃ الالیاء از دارا شکوہؒ قادری) (اردو انسائیکلو پیڈیا فیروز سنز)