Alergia ai acari
Da Wikipedia, ła ençiclopedia libara.
L'ałergia ai acari ła xe na forma de ałergia respiratoria che interexa na bona parte de ła popolaxion (ghe xe dei studi epidemiologici che parla del 19%-21%). Ła xe na causa tra quełe pi importanti de łe alergie de casa.
I acari i xe dei artropodi (questo xe el nome del Phylum), dea clase dei aracnidi. Quełi che centra nel discorso de ła ałergia de casa i xe ciàma Dermatophagoides, deti anca acari dea casa. Le do specie che conta le xe el Dermatophagoides pteronyssinus e el Dermatophagoides farinae. Sti acari i xe grandi pochi micron e par rifornirse de aqua no i pol bevarla diretamente, ma i dipende dal'asorbimento del vapor aqueo. Par sta rason i xe sensibiłi al'umidità relativa del'aria e sicome l'umidità ła xe corełà co ła temperatura, le condisiòn favorevoli al svilupo dei acari xe quele de un'umidità relativa almanco del 60%-70% e sora i 20-25 gradi çentigradi.
I acari de ła caxa (che na volta i vegnea ciamà acari de ła polvare) i magna resti de pełe umana (rufa, tochi de ongie, pełi) che i trova intei stramasi e intei cuxini, dove, tra l'altro ghe xe tute le condision de umidità e de temperatura che ła serve par el so svilupo. I ałergeni dei Dermatophagoides i xe tochi dei stesi e le so dejexion; quando che i vién respirà, i scatena, in quei che xe ałergici, la reaxiòn ałergica parchè i incontra i so anticorpi specifici Ig-E. El risultato clinico pol esare rinite, congiuntivite e asma. Visto che i ghe xé in tute le stagiòn, l'ałergia ła xe persistente e no intermitente come sucede, par esempio, coi pòłini. Quando che vién fata ła diagnosi de ałergia da acari, ła prima roba da fare xe na bona bonifica anbientale de ła camara da łeto: gnente moquette, pelouche, tende gròxe, tapeti. Va ben anca sbasare el łiveło de umidità (no umidificatori), darghe aria diverse volte a ła camara, fodere antiacari par i stramasi e i cusìn. Se pol doparare, sempre in camara, i spray acaricidi sui stramasi e metare dei filtri che neta de continuo l'aria.
