Brian Reynold Bishop
From Wikipedia
Cifal anuik Volapükanefa: Brian Reynold Bishop (Britäna-Linglänapüko: [ˈbɹʌɪ̯ən ˈɹɛnəɫd ˈbɪʃəp], Lamerikäna-Linglänapüko: [ˈbɹaɪ̯ən ˈɹɛnəɫd ˈbɪʃəp]) pämotom ün yel 1934 tö Kingston upon Thames (adelo fozif di London), in Linglän. Da lif lölik oka änitedälom vemo dö püks e pükav. Dü yunüp oka, ün kel ästudom Fransänapüki, Spanyänapüki e latini, ätüvom dabini pükas i mekavikas, kels äjänälons omi, e kelis ävilom studön dibikumo. O süpäd kion, das kanoy jafön püki nulik! Ön mod at, ätüvom Sperantapüki, kela dialimi ästunidom vemo. Ab pük at äbinon-li pük balid atsotik ad pajafön? Pos studs fovik, ätuvom jenöfo pükis votik, bevü kels äbinon Volapük fa hiel Johann Martin Schleyer: jenöfo pük balid, kel pegebon da vol as pük bevünetik. Pük at ästigedon nitedäli omik. Dü livüp oma, äprimom ad spodön ko hiel Arie de Jong, kel irevidom püki rigik ela Schleyer, fiediko dakipölo ai prinsipis datuvala. Id äspodom ko hiels Johann Schmidt e Johann Krüger, kels id ävedoms ettimo cifals Volapükanefa, e ko Volapükans votik zilik.
Ye pos matikam omik e moted cilas tel, nes glömön gidedis cala omik as tatacalan, ämutom ropön jäfedi pro Volapük dü tim anik. Ab ün yel 1979, yubidayel tumyelik Volapüka, nemödikos äjenon. Sekü atos, äpenom lü delagaseds cifik läna e lü radionastajons tefü atos. Splod niteda äsökon. Kodü atos, äfünom Zänabüri Volapüka domü ok ed ägetom Volapükadinis mödik, cifiko se konlet ela Johann Krüger, kel ün yel 1981 älovegivom ome vicifalami Volapükanefa medü dalebüd yela 1981 tü del teldegkilid tobula, ed ün yel 1984 älovegivom id ome cifalami medü dalebüd yela 1984 tü del balid yanula.
Anu lif nulik äprimon pro Volapük. Dabük gaseda nulik almulik tiädü Vög Volapüka äpubon ün yel 1989. Poso bevüresod pägebon bevünetiko, kel älofon pötis gudik mödik pro propagid Volapüka, kelis flens püka no änekälons. Resodatopeds bal pos votik äpubons, kels älofons vödabukis, tidodemis nulik e literati alsotik. Flenef Bevünetik Volapüka i päfünon ad kuradükön kosädi bevü Volapükaflens valöpo ed ad propagidön püki it.
[redakön] Lautots
- 1998. La ĉifaloj de Volapük. In: Menade bal püki bal. Ferschrift zum 50. Geburtstag von Reinhard Haupenthal. Festlibro por la 50a naskiĝ-tago de Reinhard Haupenthal, pads: 375-390. Saarbrücken: Edition Iltis.
